“Lufta ndaj korrupsionit me asistencë gjermane”
Kryeprokurori Adriatik Llalla deklaroi se skenari për vrasje të deputetit Tom Doshi ishte thjesht një inskenim i dy deputetëve, atij dhe Mark Frroku për qëllime që pritet të dalin gjatë gjykimit. Në një intervistë për DW, Llalla ka hedhur poshtë të ketë lidhje transfermimi i drejtuesit të Prokurorisë së Krimeve të Rënda me këtë çështje.
“Për rastin e denoncimit të deputetit Tom Doshi, sipas të cilit ishin paguar disa persona për ta eleminuar fizikisht, tashmë ai hetim ka marrë një drejtim tjetër. Deputeti Doshi, si edhe një tjetër deputet, Mark Frroku, tashmë po merren të pandehur pasi nga hetimi rezultoi se skenari për vrasje të deputetit Doshi ishte thjesht një inskenim i këtyre dy ligjvënësve për qëllime që pritet të dalin gjatë gjykimit”, tha Kryeprokurori.
Llalla, nga Gjermania ku ndodhet për një vizitë zyrtare tregon masat që do të marrë institucioni i akuzës për të luftuar korrupsionin.
Llalla për Deutsche Welle, thekson se sfida e dekriminalizimit sapo ka isur dhe kërkon kohën e vet. Ndërkaq, duke folur për bashkëpunimin me drejtësinë gjermane, ai thekson se do të ketë rezultate konkrete sa më shpejt.
“Sot, sfida e shtetit shqiptar, përfshirë edhe Prokurorinë, është përballimi dhe çmontimi i strukturave kriminale dhe korruptive të krijuara për vite me radhë. Nuk është e lehtë, por jo e pamundur. Në Shqipëri ka vullnet për të forcuar shtetin ligjor. Prokuroria ka mbështetjen e faktorit politik parlamentar për të forcuar rolin e saj dhe, në një vend ku shoqëria është e politizuar, kjo është një vlerë pozitive në punën e institucioneve të pavarura. Gjithashtu, kemi fituar besimin e partnerëve ndërkombëtarë, pasi po dëshmojmë se jemi partnerë seriozë në luftën kundër krimit të organizuar. Por, sërish duhet theksuar se kemi shumë punë për të bërë”, tha Llalla.
Kryeprokurori theksoi se pritet që nga Gjermania do të ndihmojë Shqipërië me “asistencë teknike dhe ligjore për forcimin e aktivitetit hetimor dhe pavarësisë së institucionit. Prokuroria gjermane është një ndër strukturat lider në Europë sa i përket hetimit dhe besojmë se mbështetja e saj do të vijojë të jetë një bazë shumë e rëndësishme për të rritur kapacitetet institucionale në luftën kundër korrupsionit dhe krimit të organizuar. Mund të them me kënaqësi, se gjetëm mirëkuptimin e plotë nga ana e homologëve gjermanë për këto kërkesa”.
/tesheshi.com/
