Ndeshja e parë e grupit D në Euro 2016, midis Kroacisë dhe Turqisë, sapo ka përfunduar 1-0. Një 90-minutësh i luajtur fort në çdo moment, me përplasje dhe fizike, ku më spikatës cilësisht kanë qenë kroatët.
Luka Modriç dhe Rakitiç patën rol thelbësor në fitoren e ngushtë ndaj Turqisë. Goli do të shënohej pikërisht nga mesfushori i Realit të Madridit, Modriç, që në minutën e 41-të goditi fort nga jashtë zonës, me topin që pushoi në rrjetë.
Veç kësaj, kroatët patën dhe një sërë rastesh, duke goditur dhe traversën dy herë, një herë nëpërmjet një goditjeje dënimi të ekzekutuar nga Srna, e një herë përmes një goditjeje me kokë nga Perisiç.
Ozan Tufan pati rastin më të pastër për turqit në pjesën e parë. I pambuluar, ai goditi me kokë, por në qendër, duke ia bërë të lehtë punën portierit kroat.
Në fundin e pjesës së dytë pati një presion të shtuar të lojtarëve turq, por që nuk dha rezultat. Në fushë do të futej dhe Emre Mor, një prej tre lojtarëve më të rinj në këtë kampionat. 18-vjeçari, i sapoblerë nga Borusia e Dortmundit, shfaqi klasin e tij në disa raste, por pa bërë më shumë.
Kroacia e nis kështu me këmbë të mbarë aktivitetin, ndërsa për Turqinë punët vështirësohen. /tesheshi.com/
