Nga Blendi Gashi
Kriza parlamentare në Kosovë ka shkuar deri në atë pikë, sa vështirë të shihet ndonjë zgjidhje po te ishte për palët e atyshme, opozitën dhe mazhorancën. Dhe siç ndodh në të tilla raste, vështrimi hidhet nga Dragodani.
Nga amerikanët pra, që deri më tani kanë qëndruar të heshtur, por që siç mund ta dijmë të gjithë jo aq symbyllur ndaj asaj çfarë po ndodh në sallën e parlamentit që po i del tymi në çdo seancë
Ulja në një tryezë të përbashkët e liderëve politikë të vendit; shkuarja në zgjedhje të parakohshme; krijimi i një qeverie teknike apo gjithpërfshirëse, por dhe një referendum, përmenden si opsione për të dalë nga ngërçi politik.
Presidentja Atifete Jahjaga pritet të aktivizohet në lehtësimin e krizës politike në vend. Ajo së shpejti do të thërrasë në takim liderët e dy blloqeve të politikës kosovare. Lajmi është konfirmuar nga Presidenca, e cila ka deklaruar se presidentja ka vendosur të luajë rol aktiv për tejkalimin e gjendjes së krijuar ndërmjet pozitës dhe opozitës.
Analistët japin disa zgjidhje
Njohësi i rrethanave politike në vend, Avdullah Bytyqi, nuk ngurron ta shoh zgjidhjen në Dragodan: “Palët duhet të bisedojnë në të kundërtën polarizimet e më tejshme mund të sjellin konlfikte të rënda, të cilat mund ta rrënojnë imazhin e Kosovës në opinioin e jashtëm dhe ta polarizojnë edhe shoqërinë. Zgjedhjet janë një alternativë, si dhe ndërhyrja e amabadave të huaja, konkretisht SHBA-së që të tejkalohet kriza politike. Nuk përjashtohet edhe mundësia e krijimit të një qeverie gjithpërfshirëve ose teknike”, ka deklaruar Bytyqi për tesheshi.com.
Për analistin politik Kushtrim Gashi, zgjidhja bazë është tek ulja në bisedime mes palëve:
“Në rast se do të pajtoheshin pozita dhe opozita që vendi të shkojë në zgjedhje të jashtëzakonshme, atëherë nuk do të kishte nevojë për një qeveri teknike dhe as gjithëpërfshirëse. Ajo se çfarë do të ishte e nevojshme është përgatitja e zgjedhjeve të jashtëzakonshme. Megjithatë zgjedhjet nuk do të sjellin zgjidhje”, thotë Gashi për tesheshi.com.
Shoqëria civile e shqetësuar
Organizata të shoqërisë civile janë bashkuar në një deklaratë, në të cilën shprehin shqetësimin për gjendjen politike të krijuar në vend. Ato dënojnë dhunën nga kushdo, duke e cilësuar si të papranueshme në demokraci.
“Me qëllim që t’i ipet epilog gjendjes së krijuar, ne kërkojmë prej subjekteve politike si hisedarë në këtë proces, që të lëvizin nga pozicionet e tyre ekzistuese, të cilat përveçse nuk prodhojnë zgjidhje ato po përshkallëzojnë tensionin politik dhe e vënë në pikëpyetje perspektivën e vendit. Gjuha e dialogut politik është forma e vetme e zgjidhjes së problemeve politike.
Thirrja e seancave plenare pa ndryshim të qëndrimeve dhe rrethanave politike, nuk i shërben daljes nga situata e krijuar politike. Po ashtu, ne kërkojmë që në këtë proces të përfshihet edhe presidentja e vendit si garante e funksionimit kushtetues të institucioneve”, thuhet në deklaratën e përbashkët të organizatave të shoqërisë civile.
Ndryshe, opozita e bashkuar është kategorike në qëndrimet e saj duke thënë se kryeministri Mustafa ka dy alternativa: ose të tërheqq nënshkrimin nga marrëveshjet e fundit të arritura me Serbinë në Bruksel, ose vendi duhet të shkojë në zgjedhje të parakohshme. /tesheshi.com/
