Ish kryekuvendari Jakup Krasniqi, e quan të papranueshme deklaratën e bërë nga Kryeministri Isa Mustafa, i cili disa ditë më parë ka thënë se nuk ka dialog pa liberalizim të vizave për qytetarët e vendit.
Ai, përmes një postimi në Facebook thotë se duke dëgjuar deklarata të tilla frikësohet nga marrëveshjet e reja komprementuese për Kosovën dhe qytetarët, të cilat janë në pritje.
“Nuk e di çka mendojnë të tjerët, por e gjithë përvoja ime, sidomos në 5-6 vitet e fundit dhe jo vetëm, është më shumë se e hidhur sa herë që qeveritarët flasin për “patriotizmin” apo i shtinë brinat me BE-në, pasojnë marrëveshje të dëmshme për Kosovën. Kjo praktikë është që nga sulmi i Thaçit (urdhri për sulm) në Veri të Kosovës. Ku ra hero, polici Zyberi!”,- thotë Krasniqi në shkrimin e tij.
Ai vijon më tej duke u shprehur se para pak ditësh Thaçi e “sulmoi” BE-në, pasi ajo nuk ia dha si kompensim për marrëveshjet antikushtetuese, liberalizimin e vizave qytetarëve të Kosovës, por, pas pak dite e pamë se ai i zbuti fjalët.
“Unë frikësohem nga marrëveshjet e reja kompremituese për Kosovën dhe qytetarët e saj të cilat janë në pritje. Këta njerëz janë të pa parashikueshëm, tjetër gjë thonë e tjetër bëjnë?! Dreqi në fije nuk mund t’ju bien! Edhe dreqi ndoshta do të thoshte: Dreq qesh, por as unë s’po marrë vesh?!”,- shkruan ish kreu i Kuvendit në postimin e tij në Facebook./tesheshi.com/
