“Europianët kanë pikëpamje të deformuara për fqinjët dhe vetëveten”, shkruan The Economist duke botuar një studim mbi popujt e vendeve anëtare të BE-së, ku njerëzit janë pyetur se si e mendojnë jetën e fqinjëve dhe jetën në vendin e tyre
“Bari është gjithmonë më i gjelbër në anën tjetër të gardhit” vjen nga një frazë latine, e cituar nga Ovidi, që ka të bëjë me zilinë e shfaqur për suksesin e një njeriu tjetër.
Përshtatshmërisht, italianët e ditëve moderne, gjithashtu kanë një pamje të “gjelbërt” për fqinjët e tyre. Sipas të dhënave të reja nga Liveëhat, një studim me bazë në Gjenevë, pasardhësit e Ovidit kanë tendencë të besojnë se jeta është më e mirë në vendet e tjera sesa në vendin e tyre.
Mbi 70% e italianëve mendojnë se jeta është e mirë në Francë, kur kërkohet ta vlerësojnë atë në një shkallë nga një në dhjetë, ndërkohë që vetëm 43% e francezëve kanë të njëjtin mendim.
Italianët janë vetë-kritikë, por pikëpamjat e romantizuara për vendet e tjera, janë të përhapura gjerësisht në Europë. Në të gjitha vendet e anketuara, shumica e njerëzve besojnë se jeta në Francë, Gjermani, Itali, Suedi dhe Zvicër është më e mire nga se mendojnë qytetarët e këtyre vendeve.
Kjo krijon perceptime të çuditshme, të ndërtuara në xhelozinë reciproke. Zvicra mendon se suedezët janë më të mirët në Evropë; Suedezët janë mjaft të sigurtë se zviceranët janë ata të cilët duhen patur në të vërtetë zili.
Në të kundërt, vendet e varfëra të Europës janë hedhur në një dritë të zbehtë: shumë mendojnë se jeta në Greqi dhe Poloni është më e palumtur nga ç’është. Evropianët e tjerë e shohin Poloninë jo fort mirë, ndërsa polakët kanë pikëpamjen më të favorshme për fqinjët e tyre.
Kjo mund të shpjegojë se pse 0.1% e popullsisë së Polonisë, ndër shifrat më të ulëta në Europë, përbëhet nga njerëz që vijnë nga vende të tjera të BE-së si dhe pse ekzistojnë rreth 1.5 milionë polakë që jetojnë në Gjermani dhe Britani vetëm.
Mjerisht, disa pëlqime për vendet europiane janë të pashpërblyera. Sipas një studimi të Lord Ashcroft, një anketues Britanik, vendet skandinave kanë tendencën të jenë vendet më të pëlqyera në Europë.
Midis grupazhit të përzgjedhur, suedezët janë më popullorë nga të gjithë, me 84% të të anketuarve që kanë një pamje favorizuese ndaj vendit.
Rumania e varfër, ndërkohë, ka admiruesit më të pakët në kontinent, më pak se një e treta e evropianëve e vlerësojnë atë pozitivisht. Dhe cilat janë vendet që e vlerësojnë Rumaninë më së paku? Kroacia dhe …Suedia.
Përgatiti Alba Skëndaj – /tesheshi.com/
