Komisioneri i Bashkimit Evropian për Zgjerimin, Johannes Hahn, paralajmëroi lajme të mira për Kosovën në një datë të afërt, edhe pse nuk e bëri të ditur me saktësi se kur. Ai priti në Bruksel, ministrin për Integrime Evropiane të Kosovës, Bekim Çollaku të cilit i ka konfirmuar se së shpejti mund të ketë lajme pozitive për Kosovën rreth liberalizimit të vizave dhe nënshkrimit të marrëveshjes së Stabilizim-Asociimit.
Hahn tha se Kosova ka arritur përparim të dukshëm në përmbushjen e kritereve për liberalizim të vizave, ndërsa çështjet e hapura, sipas tij, nuk janë aq të vështira saqë të mos përmbyllen deri në fund të këtij viti.
Ministri Çollaku, me anë të një postimi në Facebook konfirmon se i ka kërkuar komisionerit Hahn rezultate konkrete për Kosovën.
“Sot kam marrë konfirmim nga komisioneri Hahn se Komisioni Evropian së bashku me shtetet anëtare të Bashkimit Evropian e kanë këtë parasysh, dhe se shumë shpejt qytetarët do të binden se Kosova si të gjitha shtetet e rajonit të Ballkanit Perëndimor ka një të ardhme evropiane”, shkruan ai. /tesheshi.com/
