Komandanti i Forcës së Sigurisë së Kosovës, Rrahman Rama shprehet se Kosova prej kohësh duhej të kishte ushtrinë dhe nevoja për krijimin e saj nuk duhet të vihet në diskutim.
“Kosova duhej të kishte ushtrinë e dhe forcën e saj si çdo shtet demokratik. Nuk po ndërtojmë ne një forcë sulmuese, por një forcë të bazuar në standarde të NATO-s e cila do të jetë në shërbim të qytetarëve pa dallime. Nuk mund të vlerësoj për pasoja, por që është e nevojshme t`i kemi forcat, nuk diskutohet”, ka thënë ai.
Rama në një intervistë për “Indeksonline” ka deklaruar se kurdo që të votohet ligji për FSK-në, kjo forcë është e gatshme për implementimin e tij, meqë tashmë ekzistojnë planet dhe obligimet e saj.
Megjithatë, ai nuk e ka komentuar çështjen e Listës Serbe dhe mohimin që i ka bërë formimit të ushtrisë, pa ndryshime kushtetuese.
“Kjo është çështje më shumë politike. Sa i përket anës së FSK-së, kurdo që merret vendimi ne jemi të gatshëm t´a implementojmë. Planet tona janë afatgjata, afatmesme dhe afatshkurtër. Ne i kemi bërë planet për misionin e ri dhe kurdo që merret vendimi ne jemi të gatshëm ta implementojmë dhe t`i fillojmë kurdo obligimet dhe planet tona”, ka thënë Rama.
Kujtojmë se Haradinaj ka premtuar gjatë fushatës zgjedhore se ushtria do bëhet brenda tre mujorit të parë të qeverisë së tij, që i bie se duhet krijuar në muajin nëntor./tesheshi.com/
