Ministri i Jashtëm i Kinës Wang Yi nënshkroi në emër të qeverisë kineze marrëveshjen mbi problemin bërthamor të Iranit.
Sipas kryediplomatit kinez, arritja më e rëndësishme e kësaj marrëveshjeje është mbrojtja e sistemit botëror të mospërhapjes së armëve bërthamore. Wang vuri në dukje se, me anën e kësaj marrëveshjeje, është fiksuar në formën e një dokumenti angazhimi i Teheranit për moszhvillimin e armëve bërthamore.
Ministri i Jashtëm i Kinës theksoi se mësimi më i rëndësishëm nga procesi i nënshkrimit të marrëveshjes është këmbëngulja në rrugën e zgjidhjes politike. Kjo marrëveshje do të shërbejë si një shembull i mirë për trajtimin e problemeve të tjera rajonale, si çështja bërthamore e Gadishullit Korean.
Megjithatë, z. Wang theksoi se arritja e marrëveshjes është vetëm pikënisja, ndërsa për zbatimin e saj duhen edhe 10 vjet të tjerë, prandaj, sipas tij, palët e ndryshme duhet të krijojnë ose të forcojnë besimin, që është baza e zbatimit të dokumentit. “Gjatë procesit të negociatave, Kina ka luajtur një rol unik konstruktiv, duke marrë vlerësimin e palëve të ndryshme. Në zbatimin e dokumentit, Kina do të vazhdojë të japë një ndihmesë të mëtejshme të përgjegjshme”, shtoi kryediplomati kinez
