Ambasadorja Yuri Kim vizitoi nga një termocentralet lundruese që mbërriti në Gjirin e Vlorës pak ditë më parë, i cili do prodhojë energji në këtë kohë krize.
Ajo dëgjoi përshkrimin e ministres së linjës Belinda Balluku, njëherësh zv/kryeministre, mbi atë se ç’përfiton Shqipëria prej tyre.
“Nga të gjitha të dhënat që kemi, një megavat për 2023-shin mesatarisht do të kushtojë 529 euro. Kostoja e megavatit nga këto njësi, në varësi të kostos së naftës, do të jetë deri në 170-200 euro, pra më pak se gjysma e asaj që do të tregtohet në bursë. Kjo është shumë e rëndësishme, pasi nuk ka të bëjë vetëm me sigurinë energjetike, ku përveç faktit që do të prodhohet 15 % e nevojës vendase, ne do arrijmë të kursejmë rreth 60 % të sasisë së parave nga ajo që do të importohet për energjinë që na mungon”, deklaroi Balluku.
Më tej ajo foli për të ardhmen e dy TEC-ve.
“Sot dhe për dy vitet e ardhshme deri sa të kemi në Triport gazin e lëngshëm amerikan, këto anije lundruese do të funksionojnë me naftë që përdoret për prodhim energjie nga njësi të tilla prodhuese. Synimi ynë është që këto dy anije lundruese të kthehen në anije prodhuese përmes LNG-së. Nga marrëveshja paraprake me ‘Excelerate Power’ në fund të dy-vjeçarit do të kemi në pronësi të KESH-it të dy anijet. Këto janë asete të rëndësishme për sigurinë energjetike të vendit, të cilat KESH-i mund t’i japë me qira në vende të tjera, duke prodhuar të ardhura për kompaninë”, u shpreh Balluku. /tesheshi.com/
