Këshilltarja e Bashkisë së Tiranës, Albina Ferko Nanaj, ka shfaqur tronditjen e saj nga një akt i pastër korruptiv shfaqur së fundi në televizor, sipas variantit me “zë e figurë”, ku një inspektor mjedisi merrte ryshfet kundrejt një leje mjedisore. Në një status në fb, ajo ka bërë thirrje për një aleancë të të ndershmëve të këtij vendi për ta luftuar të keqen e një korruptimi kanceroz për shoqërinë. Gjithashtu, ajo i referohet në fund parimeve të besimit të saj në luftën e shpallur ndaj së keqes, duke cituar dhe një thënie nga Profeti Muhamed.
Ja shënimi i saj:
“E shëmtuar te shikosh funksionare shtetërore te korruptuar, por e neveritshme kur ata jane te rinj, brezi qe duhet te ishte shpresa per ndryshim e ketij vendi.
Inspektoret qe duhet te mbrojnë qytetaret nga ndotja mjedisore, orientojnë bizneset si te marrin lejen mjedisore permes ryshfetit, pa pyetur per banoret qe duhet te vuajnë zhurmen dhe ndotjen. Çfarë mbetet për të bërë ne një vend ku hajdutet nuk kanë frikë nga ligji dhe aq më pak nga Zoti?
Ndaj korrupsionit, gjeneratorit më të madh të padrejtësisë në këtë vend, nevojitet përpjekje e organizuar dhe një aleancë e fuqishme e njerëzve të ndershëm dhe të guximshëm. Pasiviteti ynë i ka dhënë hov lukunisë së militantëve kokëboshë, motivi i vetëm i të cilëve është vjedhja dhe përvetësimi. Nëse mbyllim sytë para padrejtësive, për aq sa nuk cenohemi personalisht apo familjarisht prej tyre, shumë shpejt do të shndërrohemi në viktimën e radhës.
Kemi obligimin njerëzor, por edhe fetar, ta luftojmë të keqen, dhe mënyra më e mirë për ta bërë këtë është duke u angazhuar, duke folur, duke ndërgjegjësuar dhe motivuar. Të mos lejojmë që çështjet e rëndësishme, jeta dhe e ardhmja jonë të mbeten në duart e njerëzve, dinjiteti i të cilëve peshohet me para. Qasja jonë duhet të jetë pro-aktive, sepse jemi komuniteti per te cilin Zoti thote: “Urdhëron për mirë dhe ndalon nga e keqja.”
Në një nga thëniet e tij lapidare, Profeti Muhamed (paqja qofte mbi te) thote: “Nëse shikon një të keqe, ndryshoje me dorën tënde, dhe nëse nuk mundesh me gojën tënde, dhe nëse as kështu nuk mundesh, atëherë me zemrën tënde, por dije se pas kësaj nuk ka më besim.”
Në çdo situatë jemi të urdhëruar ta luftojmë të keqen, dhe nëse nuk mundemi, të paktën ta urrejmë. Një zemër që nuk e urren të keqen nuk ka vend për besim.”
/tesheshi.com/
