Kreu i SPAK-ut, Altin Dumani, gjatë një fjalëmbajte në Parlament lidhur me luftën kundër korrupsionit, vlerësoi se çelësi i suksesit është pikërisht pavarësia e instituiconit që drejton, pra pikërisht ajo që opozita e paragjykon.
“Përpara nesh ka shumë sfida dhe përparësi. Në mënyrë të përsëritur SPAK ka paraqitur në KLP dhe Kuvend disa shqetësime që shpreson të gjejnë zgjidhje ligjore nga Kuvendi. Sfida e parë është ruajtja e pavarësisë institucionale të SPAK. Aktualisht kemi një kornizë ligjore që siguron këtë dhe besoj se kjo pavarësi është një ndër shkaqet që SPAK ka filluar të jetë i suksesshëm në ndjekjen e veprave penale”, tha Dumani.
Ai tha se SPAK ka shtuar hetimet për çështje korruptive qofshin këto për organizata kriminale apo përfaqësues të ndryshëm të pushtetit ekzekutiv, anëtarëve të kuvendit, gjyqëtarë, avokatë, funksionarë të policisë së shtetit dhe kryetarë apo ish-kryetarë bashkish.
“Sa i takon luftës kundër korrupsionit SPAK ka ushtruar ndjekjen penale ndaj përfaqësuesve të ndryshme të pushtetit ekzekutiv, anëtarëve të Kuvendit gjithashtu edhe të pushtetit gjyqësor, avokatë, funksionarë të policisë së shtetit dhe kryetarë apo ish- kryetarë bashkish”.
Dumani kërkoi që të rritet marzhi 500 euro i ryshfetit nga zyrtarët, në mënyrë që vepra penale të hetohet nga institucioni i tij. “Kjo lejon SPAK të fokusohet te ato çështje që ia vlejnë vërtet për t’u hetuar”, tha ai. /tesheshi.com/
