Pala greke në pikën kufitare të Kakavijës kthen pas 30 deri në 40 shtetas shqiptarë në ditë, duke mos i lejuar të udhëtojnë më tej drejt Greqisë. Arsyet janë të paqarta, siç raportohet nga Kakavija.
Kufirin e kalojnë vetëm emigrantët me dokumenta të rregullta, ndërsa ata të cilët tentojnë të kalojnë kufirin me pasaportë nuk lejohen. Vetë qytetarët shprehen të revoltuar se nuk e kuptojnë arsyen e kthimit. Ata pohojnë se edhe pse i kanë pasur të gjitha dokumentet e nevojshme ata nuk janë lejuar nga pala greke që të kalojnë kufirin.
Edhe pse fluksi në kufirin grek nuk është i njëjtë si disa muaj më parë sërish numri i të kthyerve e kap shifrën e 30-40 personave në ditë. Sjellja e palës greke nuk është e pazakontë, pasi shpesh shqiptarët pengohen nga autoritetet kufitare të Greqisë. /tesheshi.com/
