43-vjeçari Justin Trudeau është betuar dje si kryeministri i ri i Kanadasë, me premtimin se qeverisja e liberalëve do të jetë ndryshe nga ajo e konservatorëve të Stephen Harper-it.
Mes premtimeve të Trudeau-t në fushatën elektorale ishte deklarimi se ai do të emëronte më shumë femra në kabinetin e tij, diçka e përmbushur tashmë. Kabineti i ri qeveritar prej 31 anëtarësh ka 15 femra mes tij.
Një premtim tjetër i Trudeau-t ishte tërheqja e Kanadasë nga sulmet ajrore të koalicionit të udhëhequr nga SHBA-të mbi objektivat e ISIS-it në Siri dhe Irak, diçka që ai e ka konfirmuar dhe pas fitores së tij në zgjedhjet elektorale.
Përmirësimi i mëtejshëm i marrëdhënieve me administratën amerikane, e posaçërisht me presidentin Obama, rivendosja e lidhjeve me iranianët, rritja e numrit të refugjatëve sirianë që nga janari i 2016-ës, dhe vënia mes përparësive e çështjes së ndryshimit klimaterik, janë midis premtimeve të tjera të kryeministrit të ri kanadez. /tesheshi.com/
