Sekretari amerikan i Shtetit, John Kerry, do të vizitojë Prishtinën dhe Beogradin në fillim të dhjetorit, por, edhe pse do të kalojë fare pranë, ai nuk do të ndalet në Tiranë.
Siç bën të ditur zyra e shtypit e Departamentit të Shtetit të SHBA-ve, sekretari John Kerry do të zhvillojë në tur vizitash në Europë, e veçanërisht në Ballkan.
Pas marrjes pjesë në dy takime në Bruksel, Kerry më 2 dhjetor do të udhëtojë për në Prishtinë, ku do të takojë krerët më të lartë të shtetit, presidenten Jahjaga, kryeministrin Mustafa, si dhe shefin e diplomacisë, Hashim Thaçin.
Zyrtari i lartë i SHBA-ve do të takohet dhe me pjesëtarë të KFOR-it e përfaqësues të pakicës serbe. Ende nuk është përcaktuar nëse do të ketë takime me opozitën. Siç mësohet, ai do të kërkojë t’i bindë palët për “shkrirjen” e marrëveshjes Prishtinë-Beograd, e cila u pezullua nga Gjykata Kushtetuese e Kosovës.
Më pas John Kerry do të vizitojë Beogradin, ku do të marrë pjesë më 3 dhjetor në Këshillin e Ministrave të OSBE-së, presidencën e së cilës e mban Serbia.
Pas Beogradit, sekretari amerikan i Shtetit do të vizitojë Qipron dhe Greqinë. /tesheshi.com/
