Qeveria e Shkupit ka marë një goditje të fortë nga aleati i saj Gjermania, ambasadorja e së cilës, Kristine Alltzauher, pa një gjuhë diplomatike dhe shumë qartë, kërkoi dorëheqjet e ministrave të qeverisë si parakusht i nevojshëm për hetim transparent dhe të paanshëm lidhur me aferën e përgjimeve.
Partinë Demo-Kristiane të kancelares Angela Merkel, zyrtarët e lartë të VMRO-së, gjithmonë e kanë llogaritur mbështetëse të fortë të politikave të saj, ndërsa asnjëherë nuk kanë hezituar të potencojnë në paraqitjet e tyre publike se Gjermania është një mike e ngushtë e Maqedonisë, dhe në këtë drejtim, fushata mediale këtu në Maqedoni për pjesëmarjen e sekretarit të partisë Vllatko Gjorçev në kongresin e 27-të, të CDU-së, i cili vitin e kaluar u mbajt në Këln, kishte për qëllim të forcojë këtë bindje në opinion. Ndaj, deklarata e ambasadores gjermane një ditë më parë, erdhi si rrufe në qiell të kthjellët.
Ish- Shefi i Diplomacisë së Maqedonisë, Denko Maleski, për portalin tesheshi.com, deklaroi se është stërzgjatur hamendja në partinë në pushtet për hapat që duhet të ndërmarë dhe kjo ka vënë në pikpyetje marrëdhëniet tona me aleatët perëndimorë, sepse siç thotë, për standardet e tyre shmangja nga rruga demokratike është e patjetërsyeshme të shoqërohet me dorëheqje të atyrë që kanë shkelur mbi demokracinë.
“Qeveritë perëndimore po humbin durimin me qeverinë e Shkupit, ndërsa mënyra eksplicite e të shprehurit të kësaj siç bëri ambasadorja gjermane nuk ka ndodhur deri më sot. Nëse njerëzit të cilët drejtojnë shtetin, dijnë të lexojnë politikë ndërkombëtare, do të kuptojnë se rruga e vetme është dorëheqja e tyre, që të vijnë njerëz të rinj, për ta rivendosur demokracinë”, tha Maleski.
Nënkryetari i Këshillit Euro-Atlantik, Ismet Ramadani, duke folur për mesazhet e diplomacisë perëndimore, thotë se qeveria e Maqedonisë nuk e kupton gjuhën diplomatike, gjë e cila ka detyruar diplomacinë e huaj t`i thotë gjërat troç: “Është mirë që mesazhi erdhi nga ambasadorja gjermane, sepse një pjesë e garniturës së VMRO-së, janë ndihmuar, madje edhe shkolluar nëpërmjet institutit gjerman “Konrad Adenhauer. Si duket ata e kanë kuptuar dështimin e tyre në përpjekjet për emancipim politik të njerëzve këtu, dhe panë se kryeministri tenton të inskenojë incidente me ekspeditat policore të cilat i dërgoi ditë më parë në fshatrat shqiptare”, shprehet Ramadani.
Ai shton se porosia gjermane është dërguar edhe në adresë të partisë së Ali Ahmetit, për të cilin thotë se “është vonuar në dorëheqje nga qeveria, sepse tani përskaj mëkateve të veta, do të bartë edhe ato të partnerit të tij në koalicion,VMRO-së.”
Përgatiti Bekim Laci – /tesheshi.com/
