Në internet ka qarkulluar herë pas here postime se ish-presidenti i Uruguait José “Pepe” Mujica ka vdekur, por kjo nuk është e vërtetë.
89-vjeçari, një figurë emblematike e së Majtës në Amerikën Latine, tashmë ka marrë vendimin të flasë qartë për fundin e jetës së tij që po i afrohet.
Siç ka treguar ai, kanceri nga i cili vuan është përhapur dhe se po i ndalon të gjitha mjekimet: “Po vdes”, tha ai për një gazetë lokale.
“Kanceri i ezofagut po përhapet në mëlçinë time. Nuk mund ta ndaloj. Pse? Sepse jam i moshuar dhe vuaj nga dy sëmundje kronike. Asnjë trajtim, asnjë operacion nuk mund të bëhet sepse trupi im nuk do t’i përballonte ato”, tha Mujica në një intervistë që dha të martën dhe botuar dje, të enjten, në gazetën javore Busqueda.
“Rrethi im është i mbyllur. Është e qartë, unë jam duke vdekur. Luftëtari ka të drejtë të pushojë. Më lini të qetë. Mos më kërkoni më intervista apo ndonjë gjë tjetër”, shtoi ish-presidenti që ka shërbyer nga viti 2010 deri në vitin 2015.
Mujica tha se tashmë ka filluar procesin e bërjes gati të varrit në kopshtin e fermës së tij modeste, në periferi të Montevideos, nën një pemë që mbolli vetë dhe pranë qenit të tij, Manuelës. ”
Pavarësisht gjendjes shëndetësore, Mujica mori pjesë aktive në fushatën presidenciale për zgjedhjet e dhjetorit, të cilat u fituan nga kandidati i koalicionit të Majtë, Yamado Orsi.
“Dua të them lamtumirë bashkatdhetarëve të mi. Është e lehtë të respektosh ata që mendojnë si ti, por duhet të mësosh se themeli i demokracisë është respekti për ata që mendojnë ndryshe. Ju puth të gjithëve!”, përfundoi ai.
Ai ishte “presidenti më i varfër në botë”, siç e quanin, sepse pothuajse të gjithë rrogën e tij si kreu i shtetit i jepte një programi social strehimi.
Por si i majtë, José Mujica i “vuri minat” Uruguait me miratimin e të drejtës së abortit, martesës mes çifteve të të njëjtit seks dhe legalizimin e kanabisit (vendi i parë në botë, në 2013).
Ai ishte një ish-guerril i cili u torturua dhe kaloi 13 vjet në burg – shumicën e tyre gjatë diktaturës ushtarake (1973-85). Ai u zgjodh deputet, senator, u emërua ministër dhe më pas u bë president i vendit. /tesheshi.com/
