Nga Bashkim Kastrati
Donjeta Sadiku, është një vajzë e re, por sportiste e suksesshme. Është 15-vjeçare dhe vijon mësimet në shkollën e mesme ekonomike “Hoxhë Kadri Prishtina” në Prishtinë. Ajo para disa ditëve është shpallur nënkampione e Botës në Kampionatin Botëror të juniorëve, ku fitoi medaljen e argjendë.
Donjeta, në një intervistë për tesheshi.com tregon për eksperiencën e saj në këtë kampionat, sfidat që ka pasur atje, komentet e mira që e kanë karakterizuar paraqitjen e saj të suksesshme në kampionatin në fjalë. Tregon se si është pritur pas ardhjes në Kosovë, ku të gjithë iu gëzuan suksesit të saj. Ajo tregon edhe për vështirësitë dhe sfidat që i ka si sportiste e re, sidomos me mungesën e kushteve adekuate, të cilat i kanë rivalet e saj nëpër vende të tjera. Donjeta shpreson se do të përkrahet më shumë ajo dhe kolegët e saj nga institucionet kompetente që të iu krijohen kushte më të mira për stërvitje, ndërsa thotë se qëllim primar e ka pjesëmarrjen në Olimpiadë dhe të kthehet nga atje me medalje.
Kur e keni filluar që të merreni me boks dhe kush iu rekomandoi që të merreni me këtë sport, si lindi dëshira?
Unë merrem me boks prej moshës 11-vjeçare. Si fëmijë kam pasur dëshirë të merrem me ndonjë sport luftarak, kam ushtruar edhe karate, por mua më pëlqente një sport që është më luftarak dhe vendosa të merrem me boks.
Cilat janë sukseset e deritanishme që keni arritur?
Kam qenë pjesëmarrëse vitin e kaluar në Kampionatin Evropian për juniorë dhe në këtë garë shkova deri në çerekfinale, kurse këtë vit, përkatësisht në fund të muajit maj, në Kampionatin Botëror të juniorëve që u mbajt në Taipei të Tajvanit ku arrita qëllimin tim të sjell medaljen e parë të pasluftës nga boksi kosovar. Mirëpo në kampionatin evropian që do të mbahet në Korrik besoj shumë se do të kthehem në Kosovë me medalje të artë.
Së fundi je shpallur nënkampione e Botës në kategorinë tuaj dhe i keni sjellë medalje Kosovës, a ishte vështirë ta arrini këtë sukses, sa duele i ke fituar deri te ky sukses në këtë garë?
Ishte vështirë sepse kundërshtarët me të cilat jam ndeshur kanë pasur përvojë shumë më të madhe se unë, mirëpo me forcat e mia, angazhimin maksimal dhe përqendrimin, arrita që t’i mposhti rivalet. Unë jam përballur në ring me tri boksiere deri të medalja e argjendë, kurse në luftën finale për medaljen e artë kam humbur meçin sepse pata pësuar lëndim në dorë gjatë ndeshjes së gjysmëfinales.
Cila ishte ndeshja më e vështirë në këtë garë, a mund të na përshkruani ndonjë moment që iu ka mbet në mendje nga kjo garë?
Të gjitha ndeshjet ishin të vështira, sepse të gjitha kundërshtaret me të cilat kam boksuar në këtë garë ishin të përgatitura mirë dhe gjithashtu kishin një përvojë shumë më të madhe se unë.
A kishte komente në lidhje me performacën tënde në Kampionatin Botëror të juniorëve?
Po paraqitja ime në Kampionatin Botëror të juniorëve është karakterizuar edhe me komente të shumta, ndër to sidomos tek AIBA (Federatën Ndërkombëtare të Boksit) dhe secilën herë kur jam ndeshur kanë qenë të befasuar dhe kanë shkruar edhe në faqen e tyre zyrtare se paraqitja ime në ring në këtë kompetcion ishte befasi për AIBA-n.
Si u pritet në Kosovë pas këtij suksesi, si në shoqëri në shkollë etj?
Pas paraqitjeve të mira dhe rezultatit të mirë që mora si nënkampione , pra medaljen e argjend edhe në Kosovë ishte një pritje e madhe nga të gjithë dhe kjo përkrahje me ka bërë të lumtur dhe padyshim edhe me ka motivuar që të angazhohem edhe më shumë për të pasur suksese të tjera dhe të sjellë edhe medalje tjera. Gjithashtu kjo pritje e mirë dhe ngazëlluese ishte edhe për faktin pas 37 viteve kam arritur që të sjellë medalje nga garat e boksit.
A është e vështirë të merresh me këtë sport në Kosovë? Ku i bëni stërvitjet, a keni kushte të mira për të stërvitur në Kosovës, a konsideroni se keni përkrahje nga institucionet në aktivitetin tuaj?
Stërvitjet i bëj në pallatin e rinisë me trajnerin tim Besim Brahimi, të cilin e falënderoj. Ndërsa kushtet nuk janë të mira, sepse unë në botëror kam bërë stërvitjet e klubit katër mujore dhe të federatës 10 ditore, kurse kundërshtaret e mia kanë bërë përgatitje 5-6 mujore në shtete të tjera në kampingje të ndryshme. Gjithashtu edhe unë dua që të më dërgojnë në kampingje për faktin se në Kosovë nuk ka femra që të bëj sparigje, që është një trajnim duke zhvilluar duel me kategorinë e njëjtë në kuadër të trajnimit. Kurse në Kosovë jemi vetëm dy femra që merremi me boks.
Cila është ëndrra jote që do të doje ta realizoje si sportiste?
Ëndrra ime si sportiste dhe për të cilën do të angazhohem dhe të punoj vazhdimisht është pjesëmarrja në Olimpiadë dhe sjellja e medaljes nga Olimpiada. /tesheshi.com/
