Mbreti Salman i Arabisë Saudite urdhëroi rishikim të masave të sigurisë për pelegrinazhin e Haxhit pasi të paktën 717 persona humbën jetën në incidentin e ndodhur pranë qytetit të shenjtë të Mekës.
Të plagosur kanë mbetur 863 persona në incidentin e ndodhur në Mina, ndërkohë që rreth 2 milionë pelegrinë marrin pjesë në Haxh.
Mbreti i Arabisë Saudite tha se kishte nevojë “për të përmirësuar nivelin e organizimit dhe menaxhimin e lëvizjes së pelegrinëve”.
Qeveria saudite ka ngritur një komision për të hetuar incidentin. Sipas ministrit të Shëndetësisë, incidenti ndodhi pasi shumë pelegrinë po lëviznin pa respektuar afatet kohore që janë vendosur nga autoritetet.
Ajatollah Ali Khamenei, lideri suprem i Iranit, që humbi 95 shtetas në incident, ngarkoi qeverinë saudite me përgjegjësi.
Papa Francesku u shpreh se është afër myslimanëve gjatë një lutjeje në Katedralen e Shën Patrikut në Nju Jork. /tesheshi.com/
