Kryeministri Rama zbërtheu arsyet e ikjeve, duke e trajtuar atë si fenomen global, që siç tha, prej së cilit edhe Perëndimi mund të falimentojë.
“Ne jemi në kushtet sot se Europa ka filluar një luftë e cila do të bëhet çdo ditë me e pamëshirshme që të kujton atë shprehjen ‘peshku i madh do të haj të voglin’ me çdo çmim dhe ‘robi do të jetë ujk për robin’.
Rënia e lindjeve ka ardhur sot në pikën ku po reflektohet në tregun e punës ku vendet më të zhvilluara janë në situatën ku ose duhet të rrëmbejnë nga të katërt anët krahë punë, ose duhet të pranojnë perëndimin e suksesit dhe fillimin e falimentimit të tyre që nga Gjermania, lokomotiva e Evropës, e cila deri në 2030 ka nevojë për 7 mln punëtorë jashtë sistemit të demografisë gjermane”, arsyetoi kreu i qeverisë.
Rama vijoi duke thënë se “ligji që ka kaluar Gjermania para pak javësh duhet të ngulitet në kokën e atyre që merren me ligjvënien në Shqipëri. Kurrë më parë një shtet nuk ka bërë një ligj për punonjës të pakualifikuar. Sot është hapur totalish dhe kjo do të jetë tendenca e përditshme në Europën ku jetojmë. Përpjekja jonë është një përpjekje titanike për ta përballuar këtë situate”, theksoi Rama, duke mos ia pranuar opozitës tezën akuzuese të ikjeve.
“Kënga ‘po ikin po ikin’ është një këngë e turpit më të madh të kujtdo që e këndon nga politikëbërësit. Kjo nuk është një arsye fare për luftëra të brendshme. Është impakti dramatik i produkteve të globalizmit. Qasja duhet të jetë krejt tjetër”, tha Rama.
Kujtojmë që fenomeni i ikjeve ka mbëthyer keqaz dhe vendet e rajonit, sidomos Kosovën dhe Maqedoninë, duke shkuar deri në nivel të psikozës kolektive. /tesheshi.com/
