Arabia Saudite vijon të sjellë hurma për besimtarët muslimanë shqiptarë, një rit me konotacion “ndihme” ose fetarisht “sevapi”, i cili daton që në vitet e para ‘90-të, kohë kur shqiptarët ishin sa të pangrënë aq dhe të padijshëm ndaj botës, përfshirë dhe produktet e saj ushqimore. Kështu, asokohe u shfaq hurma arabe, ardhur nga Saudia në pako ndihmash të ndryshme, kryesisht për komunitetet e para muslimane, të cilat veç shijes përbënin dhe një kuriozitet natyror. Dhe ky rit vijon ende, paçka ndryshimit rrënjësor të shoqërisë shqiptare, si dhe të komuniteteve muslimane, që sot janë në rrethana krejt të tjera ekonmike, me një status social krejt tjetër, tjetër formim fetar, si dhe botëkuptime e ambicie krejt të tjera.
Siç thuhet në një njoftim të Komunitetit Musliman, “në bashkëpunim me qendrën Mbreti Selman për Bamirësi dhe Ndihma Humanitare, dhe me koordinimin e ambasadës së Mbretërisë së Arabisë Saudite në Tiranë, zhvilluan ditën e djeshme në ambientet e Medresesë së Tiranës, ceremoninë e inaugurimit të projektit të dhurimit të 25 ton hurmave arabe nga Mbreti i Arabisë Saudite dhe Kujdestari i Dy Xhamive të Shenjta, Selman Bin AbdulAziz Al-Saud”.
Gjithsesi, debati fetar në këtë rast është nëse duhet apo jo të bëhet publik një akt i tillë bamirësie, mu prej këshillës hyjnore se “njëra dorë nuk duhet ta dijë se ç’jep tjetra”.
Debati tjetër mund të ishte ai nëse 25 tonët janë më imperative të dërgohen në Gaza e jo te muslimanët e mirëushqyer shqiptarë, jo vetëm me hurma arabe. /tesheshi.com/
