Paris Saint Germain pëson humbjen e parë në kampionatin francez. Yjet e kryeqytetit, “i kanë lejuar vetes” një humbje, pasi më tepër janë kujdesur të mos “bëhen pis” në fushë, sesa të përmbysnin rezultatin. Strasbourg nuk u shfaq për asnjë moment inferior dhe luajti në mënyre energjike, duke realizuar dy kundërsulme model.
Fillimisht ishte Da Costa ai që kaloi vendasit në avantazh, me parizienët që u kapën të papërgatitur. Por kur Mbappe barazoi në fund të pjesës së parë, të gjithë menduan se për Strasbourg, do të niste pësimi.
Në fakt ndodhi krejt e kundërta, pasi vendasit luajtën fort dhe në një tjetër kundërsulm, shënuan sërish golin e avantazhit me anë të Bahoken që gjuajti fort në zonë. Neymar e Mbappe u përpoqën të reagojnë, por pa mundur të barazojnë rezultatin, i cili mbeti i pandryshuar, 2-1.
Por humbja e së shtunës nuk është ndonjë “big deal” për PSG, pasi shkëputja prej 10 pikësh nga ndjekësit, thjesht i vonon arratinë, por nuk ia ndalon dot atë. /tesheshi.com/
