Komiteti Teknik COVID vendosi të mos ndryshojë asnjë prej vendimeve të deritanishme në kuadër të masave. U tha se infektimet janë në rënie, por shqetësim mbetet shkalla e shtrimeve në spital.
“Kemi një tendencë të uljes së infektimeve ditore, prej datës 1 mars kemi një trend të uljes së qëndrueshme, por kemi një numër të lartë të hospitalizimeve, vdekjeve dhe infektimeve në rrije prej muajit janar. Numri i infektimeve mbetet shqetësues në kontekstin rajonal dhe evropian, ku ka një trend të lartë të infektimeve. Masat do të qëndrojnë të njëjta”, tha ministrja Manastirliu.
Nga ana tjetër, ajo shtoi se ka të dhëna për praninë e mutacionit britanik në vend.
“Janë analizuar kampione, ku ISHP ka bashkëpunuar me Ankaranë, të cilat treguan se janë të infektuara me variantin e ri, pra mbajnë një shenjë të mutacionit britanik, ky mutacion është varianti britanik”, shtoi ministrja.
Të njëjtën gjë theksoi dhe Shefja e Departamentit të Epidemiologjisë dhe Kontrollit të Sëmundjeve Infektive në ISHP, Dr. Silva Bino.
“Në Shqipëri janë konstatuar mutacione dhe janë analizuar në mostra që ka pasur dyshime, që kanë pasur kontakt me njerëz jashtë shtetit, apo ata që janë riinfektuar dhe persona që kanë ardhur nga survejanca e sëmundjeve të rënda respiratore nga shtrimi në spitale. 70 përqind e rasteve të ekzaminuar, ka rezultuar b117, varianti britanik pra”, tha Bino.
Nga ana tjetër, ministrja Manastirliu tha se procesi i vaksinimit po vijon pa ndëprereje.
“Do të fillojmë me vaksinim e personave plus 80 vjeç, gjithashtu do të fillojmë me vaksinimin me Astrazeneca, janë mbi 21 mijë vaksina të kryera. Kemi pothuajse të mbyllur personelin shëndetësor, më shumë se 4 mijë të moshuarit plus 80 vjeç e stafet që shërbejnë për ta”, theksoi ajo. /tesheshi.com/
