Edhe pak javë e në disa akse rrugore të Shqipërisë, do shtohet qarkullimi. Sidomos në ato të jugut, që të çojnë kah zonat bregdetare, që afrimi i stinës së ngrohtë, e më pas asaj të nxehtë siç është vera, e shton interesin e shumëkujt për t`i shijuar.
Por ja që i thonë Shqipëri dhe duhet të kesh kujdes se ku “hedh këmbën”, më saktë rrotat e automjtetit, pasi – mos o Zot – mund të thyesh zverkun, siç thotë populli. Fjala vjen, në mes të gjatësisë së autostradës Levan – Vlorë, ekziston një e çarë e frikshme përsëgjeri, ku o duhet të ndalosh për ta kaluar me marsh të parë e me pak gaz sikur po ec mbi vezë, o duhet ta kesh gazin dërrasë me mbi 100 në orë sigurisht, ndërkohë që limiti i shpejtësisë është 110. Por dhe kjo bart një rrezik, pasi kur e sheh që në suprinën e asfaltit diçka nuk shkon, ulja e shpejtësisë mund të kostojë në dëmtim të automjetit ose në aksident, mos qoftë e shkruar.
Eshtë pikërisht ajo autostradë, për të cilën Jozefina Topalli pa thënë në kohën e inagurimit se vetëm në Gjermani e kishte hasur një standart të tillë, gjë që është pjesërisht e vërtetë, nëse nuk do ishte ky kanali i llahtarshëm që duket në foto.
Ministria e Transporteve dhe Komunikacionit sapo ka nënshkruar me Bankën Botërore një ndihmë financiare pikërisht për mirëmbajtjen e rrjetit rrugor shqiptar. Dhe nuk do ishte keq që ta niste nga këto hendeqet e kobshme, që i has gjithandej ku është ndërtuar apo shtruar një rrugë e re, ku si të thuash përbëjnë çibanët e tyre, sikur dikush na ka mallkuar për të mos i gëzuar kurrë.
Pak kohë më parë, një rast i ngjashëm u bë legjendë. Ishte fjala për një gropë të hapur në mbikalimin e plepave, për të cilën u bënë një sërë kronikash televizive, derisa u bënë të gjalla strukturat e vdekura përkatëse për të vënë dorë.
Ironike në atë rast ishte sa pak metra më tutje, të priste patrulla e policisë për të të kontrolluar nëse e zbaton plotësisht ligjin dhe kodin rrugor!
/tesheshi.com/
