Eurokomisari për zgjerimin, Johanes Han ka mbërritur mbrëmë në Shkup, ndërsa mëngjesin e sotëm atij i janë bashkangjitur eurodeputetët Ivo Vajgëll, Riçard Hovit dhe Eduard Kukan në përpjekje që të asistojnë arritjen e një marrëveshjeje përfundimtare për t’i dhënë fund krizës politike në vend, kjo në bazë të kornizës së dakorduar më 2 qershor gjatë takimit me Nikolla Gruevskin, Zoran Zaevin, Ali Ahemtin dhe Menduh Thaçin në Shkup.
Han fillimisht do të takojë ndarasi lidërët politik për të finishuar me një takim të përbashkët në orët e pasdites.”Takimet që do të mbahen më 14 korrik kanë për qëllim tejkalimin e krizës politike në vend. Në ato gjithashtu, do të marrin pjesë negociuesit nga Parlamenti Evropian, Ivo Vajgëll Riçard Hovit dhe Eduard Kukan”, informon Komisioni Evropian.
Ardhja e Hanit në Shkup është përpjekja e fundit që të arrihet marrëveshje për krizën politike, ndërsa sipas paralajmërimeve ai do të jetë më i ashpër në qëndrimet, sidomos pas njoftimit të dihmës-sekretares amerikane të shtetit Viktoria Nuland se SHBA-të përkrahin fuqishëm eurokomesarin në përpjekjet e tij, pasi siç tha zyrtarja amerikane në Shkup, zgjidhja e krizës duhet të kërkohet në marrëveshjen të cilën liderët politik e nënshkruan më 2 qershor me ndërmjetësim të Komisionerit Han.
Të hënën, lideri opozitar Zoran Zaev paralajmëroi mënyra alternative për realizimin e qëllimeve të opozitës nëse dështojnë përpjekjet e komunitetit ndërkombëtarë për të siguruar institucione dhe zgjedhje demokratike në shtet, por pa dhënë detaje se çka nënkupton mënyra alternative.
Nuk përjashtohet radikalizimi i protestave të opozitës gjë e cila është paralajmëruar dhe më herët. /tesheshi.com/
