Policia gjermane po kryen një operacion të madh kundër ekstremistëve të krahut të djathtë, të cilët dyshohet se kishin planifikuar të hynin në ndërtesën e parlamentit dhe të rrëzonin qeverinë, raporton Spiegel gjerman.
Forcat speciale të policisë gjermane veprojnë njëkohësisht në njëmbëdhjetë shtete federale.
U arrestuan 25 persona, meshkuj e femra, që ishin ose anëtarë të një organizate terroriste të krahut të djathtë ose e mbështesnin atë. Ndër komplotistët janë anëtarë të lëvizjes ekstreme Reichburger (qytetarë të Rajhut), të cilën policia gjermane e ka ndjekur për një kohë të gjatë për shkak të sulmeve të dhunshme dhe teorive raciste. Ai grup gjithashtu refuzon të njohë shtetin modern gjerman.
Të dyshuarit që u arrestuan janë pjesë e një grupi terrorist, qëllimi i të cilit është të përmbysë rendin ekzistues shtetëror në Gjermani dhe ta zëvendësojë atë me të tyren, dhe ata nuk e përjashtojnë dhunën kundër shtetit si një mjet për të arritur qëllimin, sipas Reuters.
Ata u arrestuan në shtetet gjermane të Baden-Vyrtemberg, Bavari, Berlin, Hesse, Saksonia e Ulët, Saksonia, Turingia, si dhe në Austri dhe Itali. Të arrestuarit do të merren në pyetje gjatë ditës.
Ministri i Drejtësisë Marco Buschmann njoftoi në Twitter se një “operacion i madh anti-terrorist” ishte duke u zhvilluar dhe se të arrestuarit “po planifikonin një sulm të armatosur ndaj organeve kushtetuese”.
Kryeprokurori tha se grupi kishte planifikuar një grusht shteti të dhunshëm që nga nëntori 2021. /tesheshi.com/
