Rreziku i përhapjes së gripit të shpendëve ka vënë në lëvizje autoritetet shqiptare, duke bërë që hapi i parë për paranadalimin e këtij kërcënimi është bllokimi i importit të produkteve të huaja.
Zëvendësministri i Bujqësisë, Roni Telegrafi dhe drejtuesit e Shërbimit Veterinar dhe Sigurisë Ushqimore u mblodhën me përfaqësuesit e stabilimenteve të rritjes së shpendëve. Gjatë këtij takimi, Telegrafi bëri një pasqyrim të situatës së përhapjes së këtij virusi në Evropë dhe se nuk është shumë larg vendit tonë.
“Të gjithë e dimë, ne dhe ju, që jemi të rrezikuar. Interesi është maksimal, i joni dhe juaj, për të marrë masa, me qëllim që, nëse ky virus vjen edhe në vendin tonë, dëmet të jenë sa më të pakta në industrinë tuaj, por që njerëzit të mos preken në asnjë mënyrë”, tha Telegrafi.
Nga ana e tyre, Flamur Laze, drejtori i Përgjithshëm i Shërbimeve Bujqësore dhe Edi Fero, drejtori i Drejtorisë së Shërbimit Veterinar theksuan se rreziku është serioz, për shkak të përhapjes së këtij vitusi nga shpendët shtegtar. “Për shkak të stinës, jemi vend potencial i ardhjes së virusit nga vendet e prekura, sepse siç e dimë, kjo është periudhë e migrimit të shpendëve të egër drejt lagunave tona”, tha Fero Shoqatës së Pularive.
Nga ana e tyre, sipërmarrësit kërkuan që në këtë situatë të monitorohen edhe shpendët e gjallë që vijnë nga importi, me qëllim parandalimin e ardhjes së virusit. Ndërsa Drejtori i Shërbimit Veterinar, Fero theksoi se, si masë paraprake, është bllokuar importi i shpendëve të gjallë apo të therur, nga të gjitha vendet e BE-së, ku është raportuar prania e virusit të gripit vdekjeprurës./tesheshi.com
