Greqia pritet të përmbyllë në orët e vona të mbrëmjes marrëveshjen me kreditorët ndërkombëtarë pas negociatave maratonë në Athinë.
Marrëveshja financiare cilësohet e rëndësishme për të larguar edhe një herë mundësinë e daljes nga eurozona dhe nisjen e rimëkëmbjes ekonomike të vendit e pritet të kalojë në parlamentin grek. Deputetët duhet të miratojnë kredinë e marrë përmes Mekanizmit të Stabilitetit Europian dhe paketën e reformave të kërkuara për lëvrimin e këstit të parë të kredisë në vlerë 25 miliardë euro.
Kjo marrëveshje është e rëndësishme të nënshkruhet përpara 20 Gushtit, kur Athina duhet të kryejë një pagesë për Bankën Qendrore Europiane.
Ndërkaq, Berlini është ende skeptik dhe shprehet se negociatat kanë ecur shumë shpejt. Sipas disa zyrtarëve në Berlin është më e rëndësishme një marrëveshje e mirë sesa ecuria e shpejtë e negociatave dhe përmbushja e afateve në pagesa.
Bisedimet janë përqendruar tek krijimi i një organizmi që do të merret me kreditë e këqija që kanë arritur një vlerë prej 90 miliardë euro.
Ka mosmarrëveshje për kontratat e punësimit, tarifat spitalore, pagesat me 100 këste të detyrimeve shtetërore nga bizneset private, si dhe për heqjen e pensioneve të parakohshme.
Megjithatë, situata e brendshme në Greqi nuk është e qëndrueshme, sidomos në aspektin politik. Kryeministri Cipras me gjasa dëshiron të shkojë në zgjedhje të parakohshme për të konfirmuar mandatin në zbatimin e reformave të marrëveshjes, ndërsa ndesh në kundërshti gjithnjë e më të vendosura nga fraksionet brenda partisë që janë kundër paketës së ndihmës. /tesheshi.com/
