Mbetjet e një prej masakrave më të përgjakshme në prehistorinë britanike dhe dëshmitë e kanibalizmit të epokës së bronzit u fshehën në një gropë të zbuluar vite më parë në Somerset, sipas një ekipi arkeologësh që së fundmi ekzaminuan gjetjet rrëqethëse.
Eshtrat e të paktën 37 burrave, grave dhe fëmijëve, të vrarë brutalisht midis 2200 p.e.s. dhe 2000 pes, u gjetën të hedhura në një pus natyror pranë Kanionit Cheddar në vitet 1970.
Sipas The Guardian, studimi i parë gjithëpërfshirës shkencor i gjetjeve zbulon se viktimat jo vetëm që janë therur, por edhe janë copëtuar, ndërsa disa pjesë të trupit të tyre janë ngrënë.
Kafkat e shumë viktimave u shtypën nga goditjet që shkaktuan vdekjen e tyre dhe kockat e krahëve dhe këmbëve u prenë pas vdekjes për të nxjerrë palcën. Disa kocka të krahëve dhe këmbëve mbajnë gjurmë të dhëmbëve të njeriut.
Sipas Rick Schulting, profesor i arkeologjisë prehistorike në Universitetin e Oksfordit dhe drejtues i studimit, këto janë gjetje jashtëzakonisht të rëndësishme, pasi asgjë nga ky nivel dhune nuk është zbuluar nga epoka e hershme e bronzit apo ndonjë periudhë tjetër e parahistorisë britanike. “Për epokën e hershme të bronzit në Britani, ka shumë pak gjetje që lidhen me ngjarje të dhunshme. Hulumtimi ynë fokusohet kryesisht në tregtinë, qeramikën, bujqësinë dhe praktikat e varrimit. Ne rrallë diskutojmë për luftërat apo dhunën e përhapur nga ajo periudhë, kryesisht për shkak të mungesës së gjetjeve,” vëren ai.
Siç thekson profesori, “ky zbulim është një kujtesë e ashpër se njerëzit parahistorikë mund të arrijnë nivele brutaliteti që rivalizojnë krimet moderne. Është kritike të tregohet kjo histori, pasi mund të mos ketë qenë një incident i izoluar”.
Analiza e gjetjeve sugjeron se masakra mund të jetë kryer qëllimisht në një mënyrë kaq të neveritshme për të frikësuar komunitetet përreth. Kanibalizimi i viktimave ka të ngjarë të ketë krijuar një regjim terrori që zgjati për breza në rajon.
Zbulimi u bë nga speleologët në një pus natyror 15 metra të thellë. Kockat u gjetën rastësisht, u ruajtën në kuti dhe u injoruan për dekada të tëra, derisa studimi i ri i solli përsëri në plan të parë. /tesheshi.com/
