Ndalimi i përkohshëm i linjave hekurudhore që shkojnë e vijnë nga Austria është parë si zgjidhja e momentit për autoritetet gjermane, gati të dorëzuara para valës së pandërprerë të refugjatëve.
Zyrtarët austriakë të rrjetit hekurudhor kanë deklaruar sot se trenat drejt Gjermanisë dhe në kthim do të ndalonin që prej orës 15:00, pa bërë të ditur se kur do të riniste lëvizja.
Kompania hekurudhore nacionale e Austrisë, OeBB, ka lajmëruar gjithashtu në faqen e saj elektronike se po pezullon dhe linjat që shkojnë drejt Hungarisë e në kthim, pasi nga andej arrijnë shumica e azilkërkuesve.
Ndërkaq, ministri gjerman i Punëve të Brendshme, Thomas de Maiziere, ka njoftuar se vendi i tij ka kthyer kontrollet kufitare me Austrinë, ndonëse përkohësisht. Një forcë policore shtesë, prej 2.100 policësh, është dërguar për të siguruar kufijtë.
Vetëm të shtunën kanë arritur në Mynih, në pikën e hyrjes për shumicën e azilkërkuesve, mbi 13.000 refugjatë, të pasuar mëngjesin e së dielës nga 3.000 të tjerë.
Një zëdhënës i policisë së Mynihut e përshkroi kështu situatën, “Duke patur parasysh numrat nga dje, është e qartë se ne kemi arritur cakun e epërm të kapacitetit tonë.” /tesheshi.com/
