Një ditë pas deklaratave të Bundestagut gjerman në Tiranë, se Shqipëria i ka të largëta shanset për çeljen e negociatave, për shkak të 7 kritereve ende të pa përmbushura, një tjetër mesazh i ngjashme vjen sot nga Berlini.
Kryetari i Kuvendit, Ilir Meta u prit në takime nga Kryetari i Komisionit të Jashtëm në Bundestagun Gjerman, Niels Annen dhe Zv. Presidentja e Bundestagut Ulla Schmidt në Berlin.
Annen u shpreh se pavarësisht disa zhvillimeve shqetësuese në disa vende evropiane, zgjerimi i Bashkimit Evropian është një opsion i hapur dhe i drejtë, ndaj avancimi përmes rrugëtimit realist të Ballkanit dhe veçanërisht i Shqipërisë drejt BE-së ka një rëndësi strategjike për gjithë Evropën.
“Ne këtu në Bundestag i kushtojmë vëmendje rajonit tuaj dhe jemi të përkushtuar ndaj perspektivës evropiane të Shqipërisë”, – u shpreh Annen.
Bashkë me Metën, ata ndanë bindjen se frustrimi social gjithnjë e në rritje krijon hapësira për alternativa populiste, të cilat rrezikojnë projektin evropian dhe vlerat social- demokratike, që Shqipëria ndan me Gjermaninë, ndaj përqendrimi te zgjidhjet e qëndrueshme sociale dhe ekonomike për qytetarët dhe veçanërisht për të rinjtë në vendet e Evropës Juglindore duhet konsideruar si një prioritet i përbashkët për të cilin duhet intensifikuar bashkëpunimi.
Nga ana tjetër, Meta shprehu mirënjohjen për mbështetjen e vazhdueshme të Bundestagut dhe në veçanti për qëndrimin konstant të Partisë Social Demokrate (SPD) ndaj zgjerimit të Bashkimit Evropian dhe integrimit të plotë të Shqipërisë, duke e cilësuar zgjerimin e BE drejt Ballkanit si kyç për forcimin e stabilitetit dhe sigurisë në rajon. Në këtë drejtim, Meta vuri në dukje se “Proçesi i Berlinit, ku Gjermania luan një rol parësor, është tepër i rëndësishëm për vendet tona, duke i shërbyer ndërlidhjes rajonale dhe zhvillimit socio-ekonomik”.
Në këtë drejtim, duke biseduar mbi zhvillimet e fundit rajonale, u vlerësua asistenca gjermane në avancimin e reformave kyçe dhe në zhvillimin socio-ekonomik të rajonit dhe u theksua rëndësia e zbatimit të reformës në drejtësi, si kyçe për integrimin evropian të Shqipërisë.
Gjithashtu, gjatë vizitës në Berlin, kryeparlamentari u prit në takim edhe nga zv.Presidentja e Bundestagut, Ulla Schmidt, me të cilën u vlerësuan marrëdhëniet historike, ekonomike e kulturore me Shqipërinë.
Ajo shprehu edhe një herë mbështetjen e Gjermanisë për zhvillimin social dhe ekonomik të Shqipërisë, ndërsa dy bashkëbiseduesit ndanë bindjen se perspektiva evropiane e Ballkanit duhet të avancojë dhe se Gjermania ka një rol kyç në këtë proçes. Meta theksoi se roli Bundestagut është shumë i rëndësishëm për integrimin evropian të Shqipërisë.
“Dua të shpreh mirënjohje tonë për mbështetjen gjermane ndaj Shqipërisë. Jemi të vendosur të punojmë për më tepër të drejta sociale dhe të rrisim nivelin e jetesës së shqiptarëve. Vlerësojmë ekspertizën gjermane për një arsim profesional për të rinjtë”, -tha ndër të tjera Kryetari i Kuvendit, Ilir Meta gjatë takimit. /tesheshi.com
