Ministrja gjermane e Mbrojtjes, Ursula von der Leyen, ka njoftuar se vendi i saj po përgatitet të dërgojë 650 në Mali, në kuadrin e një ndihme për misionin paqeruajtës në vendin e trazuar afrikan.
Njoftimi i ministres u bë para nisjes së kancelares Merkel për në Francë, ku ajo do të takohet me presidentin Hollande për të diskutuar mbi mbështetjen gjermane pas sulmeve të Parisit.
“Ne shumë shpejt do t’i kërkojmë parlamentit të aprovojë një mandat për 650 ushtarë,” deklaroi të mërkurën ministrja gjermane e Mbrojtjes.
Me dislokimin e këtyre trupave në Mali kërkohet të lehtësohet presioni ushtarak mbi Francën në luftën e saj kundër ISIS-it, shpjegoi ajo.
Forcat gjermane do të kenë në fokus të veprimtarisë së tyre në Mali, si pjesë e misionit paqeruajtës të OKB-së, logjistikën dhe vrojtimin.
Vendimi për dërgimin e trupave vjen vetëm një javë pasi njerëz të armatosur lanë të vrarë 19 persona në një hotel në kryeqytetin e Malit. /tesheshi.com/
