Nga Ahmet Zani
74-vjeçari Gjergj Ngjeçi nga fshati Pllanë i Lezhës, nuk është i panjohur. Ai njihet në tërë zonën si një burrë i urtë e i dashur, ndonëse është privuar nga të pasurit fëmijë.
Muzgun e jetës e kalon me të shoqen, Agën, por mirë do qe që afër të kishte dhe gjithë ata nipër e mbesa, të cilët janë në emigracion.
Megjithatë, ky njeri i mirë e ka zëvëndësuar këtë boshllëk me librat e tij të shumtë. Në shtëpinë e tij mund të gjesh shumëçka nga literatura të ndryshme: letërsi e mirëfilltë, histori, memuaristikë, teologji etj.,
Ai për këtë meriton të quhet një bukinist, ndonëse nuk bën fare tregti me to. Ai thjesht i ka mbledhur ndër vite, vijon të mbledh akoma, i ruan dhe padyshim i lexon, për të pasuruar si mendjen ashtu dhe jetën rreth e rrotull, me praninë pra sa më shumë të librit.
Por nuk ndalet me kaq, pasi tek ai një vend të veçantë zë Kur’ani, libri hyjnor i muslimanëve, të cilin ai jo vetëm që e posedon, por dhe e shfleton herëpashere duke u zhytyr me thellë në të.
Gjergji është një i krishterë katolik, madje nip priftërinjsh, por gjatë jetës së tij, ashtu si dhe të parët e tij, njohu shumë muslimanë dhe u miqësua me to.
Ai tregon se pavarsisht faktit që të parët e tij kanë qenë deri dhe priftërinj, gjyshi, Gjoni kishte pirë gjak me Asllan Dinin, një burrë i zgjuar dhe mikpritës.
“Më pas, thotë ai, ishte babai ai që krijoi miqësinë po një tjetër banor të fshatit, Kurt Mema, dhe ky mjaft i njohur. Ndërsa unë kam punuar për 30 vite me Adem Shehun nga Lura e Dibrës, hoxha i zonës”.
Kështu pra, lidhjet e tij miqësore me muslimanët kanë qenë aq të forta, sa natyrshëm në shtëpinë e tij të gjendet dhe një kopje e Kur’anit.
“Të lexosh Kur’anin për mua në radhë të parë është kulturë”, shton Gjergji.
Ai i gëzohet këtij fakti, teksa të tregon se në biblotekën e tij ekziston një pasuri e madhe me një sërë vëllimesh nga të gjitha zhanret, deri dhe ato të ideologjisë komuniste, trashëguar nga ish-sistemi.
Vetë Gjergji nuk ka patur ndonjë profesion që mund ta lidhte me librin. Ai është thjesht një pasion, tek i cili janë reflektuar dhe aspekte sociale të rrugëtimit të tij jetësor.
Ai ka punuar zbatues punimesh në “Urën e Zogut” mbi lumin Mat, për të cilën ndjen keqardhje të thellë që sot nuk funksionon, e që ka mbetur gërmadhë. /tesheshi.com/
