Uellsiani do të qëndrojë në Madrid deri në vitin 2021. Paraqitjet e jashtëzakonshme sezonin e shkuar me klubin madrilen, e po ashtu me përfaqësuesen e Uellsit, i kanë bindur drejtuesit e Realit që ta shpërblejnë lojtarin me një kontratë të re.
I transferuar tre vite më parë nga Totenhemi, Bale e ka rritur në vijimësi lojën e tij te Reali, duke u bërë një prej lojtarëve të pazëvendësueshëm. Kontrata e re do ta mbajë atë dhe pesë vite të tjera në kryeqytetin spanjoll .
Bashkë me kontratën, do të ketë dhe një rritje të rrogës së tij, me fitimet që do të shkojnë në dhjetë milionë euro në vit. Shifra që e barazojnë atë me kapitenin Sergio Ramos, për të pasur përpara vetëm Ronaldo-n, si lojtari me fitimet më të mëdha.
Për portugezin do të ketë gjithashtu një përtëritje të kontratës, që do të nënshkruhet në shtator. Me këto nënshkrime garantohet qëndrimi dhe për shumë sezone në Madrid i dy yjeve të Realit, portugezit Ronaldo dhe uellsianit Bale.
Ky i fundit shënoi dy gola ndaj Real Sociedadit në fundjavë, në javën e parë të kampionatit spanjoll. /tesheshi.com/
