Nga Blendi Gashi
Shpend Ahmeti nga Vetëvendosje dhe Lirak Çelaj nga PDKjanë dy kandidatët e vetëm deri tani që do t’i futen garës së 22 tetorit për kryetar të Prishtinës, ndërsa partitë tjera po hezitojnë të përcaktohen për kandidatin.
“Lufta” më e madhe po zhvillohet brenda LDK-së së Isa Mustafës ku disa emra haptas kanë shprehur dëshirën për të garuar me bindjen se do t’ja rikthejnë në qeverisje kryeqytetin partisë së tyre.
I tillë është Ismet Beqiri ish-shef i grupit parlamentar të LDK-së, i cili prej kohësh ka nisur një fushatë në heshtje ku mban takime me elektoratin në disa lagje të kryeqytetit. Ai, edhe pse nuk e ka marrë “Po”-në nga partia, nuk e ka problem që të dalë në intervista televizive dhe ta paraqesë veten si kundërkandidat të fortë ndaj Ahmetit.
“Sa i përket zgjedhjeve lokale në Prishtinë, padyshim që për neve kryeqyteti është komuna më e rëndësishme. Natyrisht që interesim të veçantë kemi për kryeqytetin. Jemi të bindur që mundemi me kthy pushtetin në Prishtinë. Nuk mundem me mshef faktin që tash e një kohë kam kërkesa nga strukturat dhe qytetarët që të jem kandidat për të parin e Prishtinës. Nëse më jepet rasti, besoj dhe jam i bindun, që kemi m’i fitue zgjedhjet lokale në Prishtinë. Jam i bindun që kemi shumëçka me ju thanë atyne që ash janë tue e drejtue kryeqytetin”, ka thënë Beqiri në një paraqitje televizive muaj më parë.
Por sa mund të jetë në të vërtetë kundërkadidat i denjë i Shpend Ahmetit?
Nëse shikohen rezultatet e zgjedhjeve të 11 qershorit, lehtë kuptohet se përveç dëshirës së “sëmurë” të tij për t’u ulur edhe një herë në karrigen e të parit të kryeqytetit, pasi një mandat e udhëhoqi, gjasat për ta mundur Ahmetin i ka pothuajse zero.
Rënia e votave të Beqirit nga zgjedhjet e 2014-tës, por edhe përkrahja tejet e vogël nga prishtinasit në këto zgjedhje krahasuar me Ahmetin, tregojnë qartë se ai humbjen e ka të sigurtë dhe se shumë zyrtarë të tjerë të LDK-së do të ishin shumë më fortë se Beqiri.
Beqiri, në zgjedhjet e 11 qershorit ka arritur një rezultat tejet të dobët. Ndërsa në zgjedhjet e 2014-të fitoi mbi 17 mijë vota, kurse në këto zgjedhje ka fituar vetëm 8 mijë e 666 vota, me të cilat e ka siguruar edhe ulësen e deputetit. Pra ka humbur diku 9 mijë vota.
Beqirin të pabarabartë me Ahmetin e VV-së e bëjnë edhe votat e fituara në Prishtinë që është sinjal i qartë se nuk është i preferuari i kryeqytetasve.
Ismet Beqiri në Prishtinë ka fituar vetëm 3962 vota shifër kjo tejet e vogël për një kandidat që synon t’ia rikthejë partisë së tij pushtetin në kryeqytet.
Ndërsa kandidati i VV-së Shpend Ahmeti që synon të marrë mandatin e dytë ka fituar shtatë herë më shumë vota, gjithësejt 20 mijë e 901 vota.
Ky dallim i madh në vota tregon qartë se kryeqytetasit janë të gatshëm t’ia besojnë edhe një mandate Ahmetit por assesi ta rikthejnë në pozitën e kryetarit Beqirin.
Ja kush nga LDK mund ta rivalizojë Ahmetin
Kandidat më serioz se Beqiri duke iu referuara votave të përgjithshme në zgjedhjet e 11 qershorit por veçmas ato të fituara në Prishtinë brenda LDK-së janë 3 kandidatë.
Kandidati për kryeministër i këtij subjekti Avdullah Hoti ka marrë përkrahje shumë të madhe në Prishtinë dhe padyshim se do ishte sfidues serioz i Ahmetit.
Hoti i cili ka qenë nënkryetar i Prishtinës si prijës i listës zgjedhore të LDK-sëka fituar hiç më pak se 18 mijë e 674 vota, apo vetëm 2227 vota më pak se Ahmeti, por që ky i fundit ka qenë i renditur i pesti në listën zgjedhore.
Padyshim se pas Hotit, gjithmonë duke ju referuar votave të kryeqytetasve në zgjedhjet e fundit, Vjosa Osmani do të ishte zgjidhja më e mirë për ta sfiduar Ahmetin. Edhe pse e renditur në fund të listës, konkretisht në vendin e 81-të ajo ka arritur të fitojë 11 mijë e 294 vota të kryeqytetasve, apo 9 mijë e 607 vota nga Ahmeti, por që ky i fundit ka qenë i rendituri në listë.
Një tjetër kandidat brenda LDK-së që sipas votave të fituara në Prishtinë do ishte më serioz se Beqiri për ta mposhtur Ahmetin është edhe prurja e re, Lumir Abdixhiku i cili ka fituar 8 mijë 580 vota të prishtinasve.
Mbetet të shihet nëse LDK do të synojë të rimarrë Prishtinën me Beqirin apo me ndonjërin nga tre kandidatët e lartcekur, ose nëse do të befasojë me ndonjë figurë krejt tjetër. /tesheshi.com/
