Presidenti turk Rexhep Tajip Erdogan ka nisur nisma diplomatike pas zgjedhjeve komunale të së dielës së kaluar dhe lirimit të tij nga detyrimet parazgjedhore.
Kështu, pas Fitër Bajramit(10-12 prill), presidenti i Egjiptit, Abdel Fattah al-Sisi pritet në Ankara.
Presidenti turk vizitoi Kajron shkurtin e kaluar, hera e parë në 12 vjet, dhe ftoi al-Sisin të vizitojë Turqinë, duke thënë se vizita do të shënonte një pikë kthese të re në marrëdhëniet midis dy vendeve. “Mezi pres t’i përgjigjem ftesës së Presidentit Erdogan dhe të vizitoj Turqinë prillin e ardhshëm,” tha presidenti egjiptian në atë kohë.
Gjithashtu, në fund të muajit prill është planifikuar një vizitë në Turqi e presidentit gjerman Frank-Walter Steinmeier.
Më parë, një vizitë e Erdoganit në Bagdad është planifikuar për më 22 prill, ku ai do të ngrejë kërkesën e Turqisë dhe Irakut për t’u marrë bashkërisht me organizatën kurde PKK, përgjatë kufirit të përbashkët të dy vendeve në një thellësi prej më shumë se 30 kilometra brenda territorit të Irakut. Më 15 mars, një delegacion i lartë turk i kryesuar nga ministrat e jashtëm dhe të mbrojtjes dhe me pjesëmarrjen e kreut të shërbimit inteligjent MIT vizitoi Bagdadin.
Pak ditë më parë gazeta Milliyet raportoi se më 23 prill është planifikuar të zhvillohet vizita e shumëpritur e presidentit rus Vladimir Putin në Turqi.
Më 9 maj, Erdogan pritet të vizitojë Uashingtonin, ku do të takohet me presidentin amerikan Joe Biden.
Më në fund, kryeministri grek Kyriakos Mitsotakis është planifikuar të vizitojë Ankaranë në maj. /tesheshi.com/
