Presidentja e Komisionit Evropian Ursula von der Leyen paralajmëroi të martën se tarifat “të pajustifikuara” të SHBA-së për produktet evropiane nuk do të mbeten pa përgjigje, duke lënë të kuptohet për kundërmasa, raportoi Anadolu.
“Më vjen thellësisht keq për vendimin e Shteteve të Bashkuara për të vendosur tarifa për eksportet evropiane të çelikut dhe aluminit. Tarifat janë taksa – të këqija për biznesin, edhe më keq për konsumatorët,” tha Von der Leyen në një deklaratë me shkrim, duke shtuar:
“Tarifat e pajustifikuara nuk do të mbeten pa përgjigje nga BE; ato do të provokojnë kundërmasa vendimtare dhe proporcionale”.
Ajo theksoi se BE-ja do të marrë masa për të mbrojtur interesat e saj ekonomike.
“Ne do të mbrojmë punëtorët, bizneset dhe konsumatorët tanë,” përfundoi Von der Leyen.
Presidenti i Këshillit Evropian Antonio Costa mbështeti deklaratat e saj, duke riafirmuar një përgjigje vendimtare dhe proporcionale ndaj tarifave të pajustifikuara:
“BE është e bashkuar në mbrojtjen e interesave të bizneseve, punëtorëve dhe qytetarëve të saj. Ne jemi një partner i besueshëm dhe i parashikueshëm.”
Costa shtoi se ai do të “vazhdojë të mbrojë tregtinë e drejtë globale”.
Trump njoftoi të hënën se Shtetet e Bashkuara do të vendosin tarifa 25 për qind për të gjitha importet e çelikut dhe aluminit pa përjashtime. Masa do të prekë importet nga një numër vendesh, veçanërisht partnerët kryesorë tregtarë si Kanadaja, Meksika dhe vendet evropiane që janë furnizuesit kryesorë të metaleve në tregun amerikan. /tesheshi.com/
