Papa Françesku tha se gratë që ai emëroi në Vatikan kanë dëshmuar se mund të jenë menaxhere më të mira se burrat dhe se ka shumë shovinizëm mashkullor në Kishën Katolike Romake dhe në shoqëri në përgjithësi.
Papa ua tha këtë gazetarëve në aeroplan gjatë kthimit në Romë pas një udhëtimi katër-ditor në Bahrein.
“Kam vënë re se sa herë që një grua merr një pozicion në Vatikan, gjërat përmirësohen”, tha ai.
Françesku u pyet për gratë që drejtonin protestat në Iran, por ai nuk iu përgjigj pyetjes, përkundrazi u fokusua në rolin e grave në përgjithësi.
Kur foli për gratë që caktoi në role përgjegjëse, ai përmendi motrën Raffaella Petrini, zëvendësguvernatorja e Vatikanit dhe gruaja më e fuqishme në qytet-shtet, e ngarkuar me rreth 2000 punonjës.
Ai gjithashtu emëroi pesë gra në departamentin që mbikëqyr financat e Vatikanit.
“Ky është një revolucion sepse gratë dinë të gjejnë rrugën e duhur përpara,” tha ai.
Françesku dënoi shovinizmin mashkullor, duke theksuar se ka ende shumë prej tij në botë, përfshirë Argjentinën e tij të lindjes.
“Gratë janë një dhuratë. Zoti nuk e krijoi burrin dhe i dha një qenush për të luajtur. Ai krijoi burrin dhe gruan”, tha ai dhe shtoi:
“Një shoqëri që nuk është e aftë (të lejojë gratë të kenë role më të mëdha) nuk ecën përpara.” /tesheshi.com/
