Mensur Krasniqi
Askush siç duket nuk dëshiron gjyqësor të pavarur dhe shtet ligjor në Maqedoni, e aq më pak përzgjedhjen e Prokurorit special.
Kanë mbetur vetëm edhe tre ditë nga 3 muaj që kishin në dispozicion liderët e katër partive më të mëdha në Maqedoni për të arritur një marrëveshje për dalje nga kriza politike, gjegjësisht përzgjedhjen e Prokurorit special.
Ky Prokuror sipas Marrëveshjes së Përzhinos të cilën e kishin nënshkruar këta liderë duhet të hetojë të gjitha veprimet kriminale të autoriteteve politike dhe institucionale në vend. Deri më tani partitë shqiptare nuk kanë shfaqur interes apo fuqi që të ndikojnë në përzgjedhjen e organeve vendimmarrëse, meqë sipas ish-deputetit më të zëshëm në Kuvend të RDK-së, Izet Zeqiri, BDI-ja ka dështuar edhe më herët duke mos emëruar dhe punësuar asnjë Prokurorë shqiptar.
Ish-deputeti dhe anëtari i Akademisë së Shkencave dhe Arteve të Maqedonisë, Izet Zeqiri, përmes profilit të tij në Facebook kërkon që në zyrën e Prokurorit special që do të jetë një organ në vete që do të merret me dosje të veçanta të hetimeve, të kërkohet përfaqësim edhe me tre shqiptarë.
“Është mirë që në zyrën e Prokurorit special që do të jetë një organ në vete që do të merret me dosje të veçanta të hetimeve, të kërkohet përfaqësim edhe me tre shqiptarë. Po pse BDI-ja vetëm në raste speciale kërkon barabarësi?.
Pse këtë nuk e bëri gjatë punësimit dhe emrimit të prokurorëve?”, shkruan Zeqiri në profilit të tij në Facebook.
Se duhet të ketë edhe shqiptarë që duhet ushtruar misionin e Prokurorit Special, për tesheshi.com ka folur edhe eksperti juridik Agim Nuhiu, meqë në këtë formë rritet besimi i të gjithë qytetarëve ndaj Prokurorit special.
“Me të drejt kërkohet që në këtë trup të ketë edhe shqiptarë, sepse kështu respektohen vlerat kushtetuese të vendit, garantohet siguria juridike dhe ngritet besimi i të gjithë qytetarëve për veprimet që do ti ndërmarrë Prokurori special.
Nga radhët e juristëve shqiptarë ka personalitete që mund ta ushtrojnë misionin që do të ketë prokurori special”, deklaroi Agim Nuhiu, ekspert i cështjeve juridike.
Sipas Nuhiut, Prokurorit special duhet t’i sigurohet pavarësi në ushtrimin e kompetencave, përfshirë kapacitetet institucionale dhe financiare.
Prokurori special duhet të jetë një personalitet që në vete do ti ketë atributet e drejtësisë, drejtshmërisë dhe ndërgjegjshmërisë. Në këtë mënyrë do të kemi pavarësi dhe paanshmëri, përkatësisht do të shmangen ç’farëdo ndërhyrje apo pengesa në punën e këtij institucioni.
“Sigurisht që Prokurori special do të ndërmarrë ndjekjen penale ndaj të gjithë kryerësve të veprimeve të cilat konsumojnë figurën e veprës penale të parapara me kodin penal, e që janë pjesë e aferave të fundit të cilat provokuan zgjedhjen e këtij institucioni. Ai do ta ketë të pashmangeshme bashkërenditjen e veprimeve hetimore me strukturat e policisë dhe institucioneve tjera të sistemit, në mbledhjen e të dhënave dhe informacioneve të nevojshme për inicimin e procedurës penale.
Ai do ta ketë detyrim për të siguruar dhe mbledhur provat e pranura për gjykatën, e cila do duhet ta gjykojë përgjegjësinë penale te kryerësve të veprave penale”, shtoi Nuhiu.
Ndërsa analisti Xhelal Neziri, thotë se zëvendës Prokurori Special nuk ka rëndësi se çfarë kombësie apo feje është, ai duhet të zbardhë shumë çështje në mënyrë profesionale, dhe të pavarur jo me ndikimim politik.
“Nëse kërkesa për zv/Prokuror Special ka për qëllim të vendoset një shqiptar që të mbrojë politikanët e korruptuar shqiptarë, atëherë bëhet fjalë për një manipulim të radhës i mbështjellë si zakonisht me ‘celofanin kombëtar’.
Prokurori Special dhe ekipi i tij duhet të jenë profesionistë dhe autonom dhe këtu nuk luan rol sa maqedonas e sa shqiptarë do të angazhohen. Nuk duhet që në gjyqësi kuotat e përfaqësimit për shqiptarët të mbushen me gjykatës që u propozojnë plane njerëzve të fesë se si t’i plaçkisin haxhilerët. Si në mjekësi ku kërkohet doktori më i mirë e jo ai që i përket një etnie të caktuar, edhe në gjyqësi duhet së pari të mbahet llogari për kualitetin e departamentit, e pastaj edhe për bashkësinë etnike nga e cila vjen”, përfundoi Neziri.
/tesheshi.com/
