Të dënuarit për të ashtuquajturin rasti “Monstra” në Maqedoni, që “rastësisht” janë shqiptarë, kanë kërkuar nga Gjykata e Apelit që të rrëzojë vendimin e Shkallës së Parë, që i ka shpallur fajtorë pa asnjë provë dhe i ka dënuar me burgim të përjetshëm.
Në seancën për shqyrtimin e ankesave, ata i thanë trupit gjykues të Apelit se nuk janë autorë të vrasjes së 5 të rinjve maqedonas dhe se janë viktima të një skenari të montuar nga shteti.
Avokatët e shqiptarëve të dënuar kërkuan nga Apeli ta kthejë për rigjykim rastin “Monstra”, pasi vendimi i Shkallës së Parë, sipas tyre, nuk ishte bazuar në asnjë provë.
“Kam besim te Gjykata e Apelit, pasi 5 gjykatësit janë profesionistë. Mendoj që aktgjykimi do të jetë në favorin tonë, sepse e kemi argumentuar edhe përmes dëshmive, se bëhet fjalë për një rast të montuar dhe se të dënuarit nuk janë fajtorë”, tha Naser Raufi, avokat.
Siç bën të ditur Top Channel, ndryshe nga pala mbrojtëse, prokurorja e lartë kërkoi të mbetet në fuqi vendimi i Shkallës së Parë.
Pas përfundimit të seancës në Gjykatën e Apelit, që zgjati për 7 orë, familjarët u shprehën pesimistë për rrëzimin e mundshëm të vendimit të Shkallës së Parë, pasi – siç thanë, – drejtësisë në Maqedoni nuk i beson më askush.
/tesheshi.com/
