Nga Mensur Krasniqi
Një thënie e liderit të BDI-së, Ali Ahmeti se “do t’i djegim partitë e vogla”, siç duket po vërtetohet në terren. Ajo thënie e tij, ku për opinionin mbarë në Maqedoni nuk ka qenë e vështirë të nënkuptohet se bëhet fjalë për Lëvizjen BESA, ka rezultuar së fundi me djegjen e billboardit të një prej kandidatëve të kësaj të fundit, Zeqirija Ibrahimit.
Ky incident vjen dy ditë pas Konventës promovuese të BESËS, e cila befasoi ambjentin e tejnxehur politik me pjesëmarrjen e jashtëzkonshme. Por ndërkohë, pas flakëve në billboardin e Ibrahimit, është njoftuar edhe për thyerjen e xhamave të godinës së një shtabi të BDI-së në fshatin Sllupçan të Komunës së Likovës.
Edhe pse nuk ka të akuzuar direkt për të dyja incidentet, ato reflektojnë pikërisht përflakjen e fushatës për zgjedhjet e 11 dhjetorit. Risi e kësaj fushate është pikërisht fakti se pas 15 vitesh, përballë nuk janë më BDI dhe PDSH, pasi vendin e kësaj të dytës – sipas disa sondazheve dhe perceptimeve – e ka zënë BESA.
Fakt është se dhe në ligjërimin e BDI-së, në shënjestër nuk është PDSH-ja e Thaçit, por BESA, një lëvizje politike dyvjeçare që ka shënuar kuota të lartë përkrahjeje tek shqiptarët e Maqedonisë, të zhgënjyer keqas nga politika e deritanishme e cila i ka përfaqsuar. E veçanta e incidenteve të fundit, ishte dhe reagimi i kandidatit të BESËS, të cilët paçka se iu vu flaka, – për fat vetëm në billboard – rezervoi një reagim të rallë duke kërkuar moslinçimin e tyre me gjuhën e urrejtjes.
“Megjithëse kjo është gjuha e kundërshtarëve tanë, i lus aktivistët tanë që ta përmbajnë veten dhe mos të përgjigjet askush nga ne në këtë mënyrë. Ne nuk guxojmë të ngremë dorë e ta djegim askënd. Edhe përkundër kësaj, ne duhet t’i respektojmë kundërshtarët tanë si shqiptarë dhe si njerëz që gëzojnë reputacion në familjet e tyre. Pa marrë parasysh se si veprojnë ata, përgjigjja jonë ndaj atyre është më 11 dhjetor”, shkroi Zeqirija Ibrahimi. / tesheshi.com/
