Fethullah Gylen, imami i debatueshëm me vendqëndrim në SHBA, është i dyshuari kryesor në një hetim në Turqi për pretendime për kopjim në Provimin e Përzgjedhjes së Personelit Publik (KPSS) të kryer në vitin 2010.
Gjer tani janë ndaluar me akuzën e kopjimit në provimin e KPSS-së 63 nga 82 personat e pretenduar të kenë lidhje me lëvizjen Gylen. Të ndaluarit dyshohen të jenë të përfshirë në skandalin e kopjimit, ndërsa ca kanë mundur të largohen për t’i shpëtuar arrestimit.
Zyra e prokurorit ka hetuar të dhënat e Institutit të Sigurimeve Shoqërore (SGK) mbi 350 personat të cilët iu përgjigjën saktësisht të 120 pyetjeve në provim, dhe ka zbuluar se shumë prej tyre janë të lidhur me lëvizjen Gylen.
Në një deklaratë të lëshuar të hënën në lidhje me hetimin, zyra e kryeprokurorit të Ankarasë bënte të ditur se, “Ndonëse në historinë e KPSS-së askush nuk u është përgjigjur më parë saktësisht të 120 pyetjeve në pjesën e provimit të Shkencave të Edukimit, një total prej 350 personash u dhanë përgjigje të saktë në 2010-n të 120 pyetjeve.”
Nga 350 personat, 70 prej tyre janë bashkëshortë, 23 janë të afërm, dhe 52 kanë jetuar në të njëjtën rrugë, në të njëjtin kompleks ndërtesash, në të njëjtën adresë apo në të njëjtin apartament, sipas deklaratës.
Duke marrë në konsideratë këto fakte, prokuroria dyshon se personat e sipërpërmendur ia dolën t’i marrin pikët e plota në provim me ndihmën e lëvizjes Gylen, e cila akuzohet për sigurimin e pyetjeve para provimit dhe dhënien atyre që tashmë janë vënë nën akuzë për kopjim.
Të dyshuarit janë të akuzuar për mashtrim, për falsifikim dokumentesh, për sjellje të pahijshme profesionale, dhe për sigurim të paligjshëm të informacionit konfidencial.
Fethullah Gylen, udhëheqësi i lëvizjes Gylen, i cili jeton në Pensilvani, në SHBA, është i kërkuar gjithashtu si numri një i dyshuar i hetimit mbi përgjimin e bisedave telefonike, dhe lëvizja e tij është akuzuar për depërtim në institucionet shtetërore për të përmbysur qeverinë e zgjedhur. (tesheshi.com)
