Duket se akujt po shkrihen në marrëdhëniet mes SHBA-ve dhe Kubës. Samiti i Amerikave në Panama do të jetë në qendër të vëmendjes teksa pritet që presidenti amerikan, Barack Obama, të shtrëngojë duart me homologun e tij kubanez, Raul Castro.
Obama ka sinjalizuar se së shpejti ka për ta hequr Kubën nga lista amerikane e shteteve që sponsorizojnë terrorizmin. Tre shtetet e tjera në këtë listë janë Irani, Sudani dhe Siria.
Ndërkaq, është hera e parë që SHBA-të nuk e kundërshtojnë pjesëmarrjen e Castro-s në takimin e nivelit të lartë.
Zyrtarë të Shtëpisë së Bardhë lajmëruan se John Kerry, sekretari amerikan i Shtetit, ka patur të enjten një diskutim me dyer të mbyllura me Bruno Rodriguez-in, ministrin kubanez të Punëve të Jashtme.
Obama dhe Catro zhvilluan një bisedë të shkurtër telefonike dhjetorin e shkuar, pas njoftimit se synonin të rivendosnin lidhjet diplomatike.
Presidentët e dy vendeve do të ulen për herë të parë në një tavolinë që prej revolucionit kubanez të viteve ’50 të shekullit të shkuar.
Dy zyrtarët më të lartë të SHBA-ve dhe Kubës do të darkojnë sonte së bashku me 33 udhëheqës të tjerë të rajonit. /tesheshi.com/
