Pas Shqipërisë, Presidenti i Turqisë, Recep Tayyip Erdogan, javën tjetër do të vizitojë Bosnjë-Hercegovinën, në një vizitë që rrit fuqishëm peshën e këtij vendi në Ballkan.
Përpara vizitës, Erdogan deklaroi se Turqia dëshiron rritjen e nivelit të qetësisë dhe mirëqenies së të gjithë popujve të Ballkanit në kuadrin e marrëdhënieve vëllazërore.
Në prag të vizitës, që do të realizojë në Bosnjë-Hercegovinë më datë 20 maj, Presidenti Erdogan dha një intervistë ekskluzive për revistën “Stav”, me seli në Sarajevë.
“Duam të përforcojmë edhe më shumë marrëdhëniet tona dypalëshe, të cilat janë në nivel të shkëlqyer”, tha Erdogan, duke shpjeguar këndvështrimin e Turqisë për Bosnjë-Hercegovinën.
Lideri turk tha se vizita në Bosnjë do të jetë një shans i rëndësishëm për të rishikuar marrëdhëniet me qeverinë e re të Sarajevës, e cila mori drejtimin e vendit në vitin 2014.
Pasi tërhoqi vëmendjen se vendi i tij mban një qëndrim të barasdistancuar ndaj të gjitha grupeve etnike në Bosnjë-Hercegovinë, pa bërë dallime ndërmjet boshnjakëve, serbëve apo kroatëve; Erdogan theksoi se kjo gjë duket qartë edhe në shpërndarjen e ndihmave, që Turqia bën në drejtim të Bosnjës.
“Turqia kontribuon me të gjitha mënyrat për vendosjen e stabilitetit dhe zhvillimin e Bosnjë-Hercegovinës. Ne jemi mbështetësit më të mëdhenj të procesit të integrimit euroatlantik të Sarajevës”, nënvizoi Presidenti turk.
Erdogan u ndal gjithashtu mbi gjenocidin dhe dhimbjet e Srebrenicës.
“Bashkësia ndërkombëtare duhet të nxjerrë mësime nga gjenocidi i Srebrenicës dhe të marrë urgjentisht masa kundër urrejtjes etnike”, u shpreh ai, duke u solidarizuar me dhimbjet e mëdha të popullit boshnjak.
Gjatë intervistës për revistën “Stav”, Erdogan i kushtoi vend edhe një kujtimi me liderin legjendar boshnjak, Alija Izetbegoviç.
Presidenti Erdogan shpjegoi se e kishte ftuar Izetbegoviçin për kurim në Turqi, por i ndjeri i ishte përgjigjur me këto fjalë: “Dua që Krijuesit t’ia dorëzoj shpirtin në atdheun tim.”
