Erdogani ka mbajtur përsëri dje një qëndrim të ashpër ndaj dënimit me vdekje të ish-presidentit egjiptian, Muhammed Mursi, duke iu drejtuar bashkësisë ndërkombëtare me tone të larta.
“Hej, Europë, hej, Perëndim, sikur është i ndaluar dënimi me vdekje në BE? Pse atëherë nuk nxirrni zë? Pse u vutë në krah të puçistit Sisi? I drejtohem tërë botës, tërë organizmave ndërkombëtare: Pse nuk vini sanksione?”, tha presidenti turk para një mase të jashtëzakonshme njerëzish në Kajseri.
“Nuk është e pranueshme çfarë është bërë kundër Mursit dhe shokëve të tij. Bota është në mohim të vetvetes duke qëndruar gojëkyçur. Nëse thoni, ‘demokraci, zgjedhje’, duhet ta shihni se ky vendim është një dënim i dhënë zgjedhjeve, demokracisë, dhe vullnetit kombëtar,” i mëshoi kritikës Erdogani.
Mursi pati marrë 52 për qind të votave kur u zgjodh president, po aq sa ç’mori Erdogani vitin e shkuar kur u zgjodh në të njëjtin post, gjë që i ka bërë mediat opozitare në Turqi, posaçërisht ato të Aydën Doganit (Aydın Doğan), të heqin një paralele mes fatit të dy shtetarëve. I nxitur nga kjo, Erdogani ka theksuar në manifestimin e djeshëm në Kajseri, “Hej, grupi Dogan (Doğan)! Nuk merrem me ju, ama këtë duhet ta dini, po e çoni jetën me frikë. Dijeni këtë, se ne e nisëm këtë rrugë duke veshur qefinin tonë.”
Muhammed Mursi qe presidenti i parë i Egjiptit i zgjedhur në mënyrë demokratike, por ai nuk mundi të qëndronte në pushtet më tepër se një vit, pasi më 3 korrik 2013 u largua me forcë nga posti i tij, pas një puçi ushtarak të udhëhequr nga vartësi i vet, el-Sisi, që tashmë i ka zënë vendin. Së fundi, Mursi u dënua me vdekje nga gjykata egjiptiane.
Turqia është nga të paktat vende që e ka kundërshtuar me forcë grushtin e shtetit në Egjipt, e më pastaj burgosjen dhe dënimin e Mursit. Erdogani, në veçanti, ka qenë tejet i ashpër në qëndrimin e tij ndaj el-Sisit, e po ashtu në kritikat e tij ndaj heshtjes së bashkësisë ndërkombëtare. /tesheshi.com/
