Hamdi Ulukaya, emigrant kurd dhe drejtor ekzekutiv i kompanisë Chobani që merret me shitjen e kosit, ka befasuar 2000 punonjësit e saj me orar të plotë, duke u dhuruar atyre 10% të aksioneve të kompanisë. Ky veprim i ka bërë punonjësit partnerë në kompani. Nëse bëjmë disa llogari, i bie se disa prej punëtorëve do mund të bëhen milionerë, në rast se kompania vendos të shitet ose të bëhet publike.
Në vitin 2005, Ulukaya themeloi kompaninë për përgatitjen dhe shitjen e jogurtit grek, e cila prej atëherë kishte pësuar rritje rapide përgjatë 10 viteve të fundit. Përvoja e tij e vetme në biznesin me prodhimet e qumështit lidhet me faktin se e ëma e tij kishte përgatitur jogurt të shkëlqyeshëm gjatë kohës kur ai jetonte në qytetin e tij të lindjes diku në Turqi.
Kompania tashmë ka në pronësi dy fabrika, 2000 punonjës dhe vlera e saj llogaritet të jetë 3-5 miliardë USD.
Në një letër të shkruar stafit të tij, Ulukaya shkroi:
“Qysh nga dita e parë, ëndrra ime ishte të ndaj suksesin tim me gjithë familjen, respektivisht me gjithë punonjësit të cilët bashkarisht kanë punuar dhe kontribuar në rritjen e “Choban-it” dhe avansimin e misionit tonë për ndërtimin e një kompanie moderne ushqimore”
Ulukaya ka punësuar staf të larmishëm, përfshirë edhe emigrantë të cilët përbëjnë 1/3 të stafit të përgjithshëm. Në vitin 2014, Ulukaya u zotua se do të dhurojë 2 milion $ për ofrimin e ndihmës së drejtpërdrejtë personave të rrezikuar nga Iraku dhe Siria.
Kjo dëshmon faktin se përkundër retorikës anti-imigracion, të cilën e përhapin disa politikanë, njerëz si Ulukaya janë në gjendje të ofrojnë kontribut të pashoq për shoqërinë dhe ekonominë amerikane si dhe përmirësimin e jetës së njerëzve atje. /tesheshi.com/
