Punimet e të rinjve shqiptarë dhe serbë nga Kosova, të krijuara gjatë një punëtorie të përbashkët që kishin për qëllim njohjen dhe ballafaqimin me të kaluarën, në kuadër të programit Dialogu Rinor i Kosovës, u ekspozuan në Kinemanë Armata në Prishtinë.
Organizatori ishte organizata joqeveritare Nisma Rinore për të Drejtat e Njeriut në Kosovë, e cila mblodhi 30 të rinj nga komunitetet serbe dhe shqiptare nga Kosova të cilët bashkëpunuan gjatë javës, duke shkëmbyer përvoja dhe ide.
Të rinjtë e moshës 16 deri në 30 vjeç u ndanë në katër grupe tematike: teatro, prodhime video, fotografi dhe tregime, për të përdorur forma arti për dialog dhe bashkëpunim të ndërsjellë.
Duke hapur ekspozitën, Marigona Shabiu, Drejtore Ekzekutive e Nismës Rinore për të Drejtat e Njeriut në Kosovë, tha se ka shumë paragjykime dhe se një nga qëllimet e organizimit të aktiviteteve të tilla është eliminimi i tyre.
Shabiu tha se kjo punëtori u organizua në kuadër të programit Dialogu Rinor i Kosovës, një pjesë e rëndësishme e të cilit është informimi dhe edukimi i të rinjve për atë që ndodhi gjatë luftës në Kosovë dhe cilat krime u kryen kundër popullatës civile, në mënyrë që ato të mos ndodhin më.
Një nga pjesëmarrësit ishte Fisnik Topalli, 18 vjeç, student nga Ferizaj, i cili tha se si shqiptar, java e bashkëpunimit me të rinjtë nga komuniteti serb e ndihmoi atë të shihte se si jetojnë, si ndihen në Kosovë dhe si shohin gjërat nga këndvështrimi i tyre.
“Kam mësuar disa gjëra të reja që tregojnë se si mund të jetojmë së bashku. Krahasimi i krimeve ishte një nga gjërat që mësuam, gjë që nuk mendoj se duhet ta bëjmë fare. Kam lexuar në lidhje me këtë çështje dhe kam parë shumë numra shumë herë, por nëse mbështetesh shumë te numrat, thjesht mund të fillosh të mendosh për hakmarrje dhe kjo nuk të çon askund,” tha Topalli.
Miodrag Zivkoviç, po 18 vjeç nga Graçanica, është mirënjohës që kishte mundësinë të takonte të rinj shqiptarë dhe ai ende është në kontakt me disa prej tyre.
“Mesazhi im është që ne të rinjtë krijojmë paqe, sepse bota mbetet me ne. Në mënyrë që ne të lëvizim në të ardhmen, të mos shikojmë në të kaluarën dhe të shikojmë në të ardhmen”, tha Zivkoviç. /tesheshi.com/
