Nga Redaksia
Në pjesën veriore të Kosovës ekzistojnë 11 rrugë ilegale që shërbejnë për kontrabandë të mallrave nga Serbia në Kosovë, rrugë të cilat anashkalojnë pikat kufitare G 1 në Jarinje të Leposaviqit dhe G 31 në Bërnjak të Zubin Potokut. Kshtu kanë bërë të ditur burime te potralit ‘tesheshi.com’.
Sipas burimit, Komuna e Leposaviqit ka 5 rrugë ilegale apo si i quajnë më butë institucionet e Kosovës dhe ato ndërkombëtare: “rrugë alternative”, Zubin Potoku ka 4 rrugë ilegale, ndërsa Komuna e Zveçanit, sa i përket rrugëve ilegale ka ngelur më e varfër me vetëm 2 rrugë të tilla.
Që nga viti 1999, pas hyrjes së forcave të NATO-së në Kosovë, nëpër këto rrugë ka filluar kontrabanda e mallrave e sidomos atyre të akcizës siç janë karburantet, pijet alkoolike dhe duhani.
“Çdo kamion i ngarkuar me mallra kontrabandë përcillet nga dy makina të tjera të vogla dhe atë nga 3-5 km para dhe 3-5 km mbrapa me qëllim të sigurimit të rrugës për mallin kontrabandë”, ka thënë burimi.
Sipas tij “të gjithë personat që janë të përfshirë në këtë kontrabandë të mallit përveç telefonëve celularë kanë edhe radio marrëse-dhënëse me lidhje të posaçme me qëllim të njoftimit të shoferit të kamionit për ndonjë rrezik eventual nga policia, KFOR-i apo EULEX-i”.
“Arsyeja e përcjelljes së kamionit që bahrt mallra kontrabandë nga një autokolonë në një largësi nga 3-5 km para apo mbrapa, është që në rast se takojnë ndonjë makinë të institucioneve të sigurisë ata njoftojnë shoferin e kamionit që të largohet nga rruga dhe të fshihet diku deri sa të kalojë rreziku” ka thënë burimi i portalit ‘tesheshi.com’, i cili kërkoi të mbetej anonim.
Burimi ka sqaruar se nëse rreziku vjen nga prapa, makina tjetër që është në përcjellje, në momentin kur makina e institucioneve të sigurisë, qofshin ato vendore apo ndërkombëtare, kalojnë makine e përcjellësit, ata gjithashtu njoftojnë shoferin e kamionit që të strehohet diku deri sa të kalojë rreziku.
“Në rast kur shoferi i kamionit i thotë përcjellësit se për një kohë të gjatë nuk ka ku të strehohet atëherë makina që është në përcjellje të kamionit që është i ngarkuar me mall kontrabandë pengon makinën e sigurisë që të mos lejojë t’i dalë pëarpara dhe të shkojë tek kamioni”, ka thënë burimi.
Sipas tij ka edhe shumë raste, kur përcjellësit e kontrabandës kanë aksidentuar qëllimisht makinat e policisë së Kosovës me qëllim duke bërë të munduar kamionit me mall kontrabandë që të largohet nga rreziku.
Në lidhje me kontrabandën, malli në Serbi blihet me para të gatshme pra cash, duke i bërë edhe faturë të rregullt, por jo edhe dokumentacionin për doganë.
“Kamionët e ngarkuar me mall kontrabandë të akcizës, arrijnë deri pranë pikës kufitare dhe nga aty, futen nëpër rrugë ilegale duke anashkaluar kështu pikat kufitare te Kosovës”, ka sqaruar burimi i portalit ‘tesheshi.com’.
Sipas tij në të gjitha këto rrugë ilegale është dashur që të ndodhej policia kufitare e Kosovës, si dhe një gjë e tillë është dashur që të ngjajë edhe në pjesën e Serbisë.
Ai ka shtuar se në 10 rrugët alternative ndodh kontrabandë e njëjtë ndërsa që një rrugë ilegale që është në komunën e Zubin Potokut është rrugë e veçantë pasi që në atë rrugë kalojnë kontrabande vetëm barna, apo produkte të tjera medicinale dhe cigare.
Rruga e kontrabandës së barnave dhe cigareve gjendet në Komunën e Zubin Potokut dhe kalon përmes qendrës dimërore për skijim të Serbisë, pra Kopavnikut.
“Në një pjesë të kësaj rruge në territorin e Serbisë gjendet një repart ushtarak i Ushtrisë së Serbisë dhe për këtë arsye, pra Ushtria e Serbisë nuk lejon që autobotet e ngarkuara me naftë të kalojnë andej pari, për arsye të sigurisë së garnizonit serb”, ka vazhduar zyrtari që flet për tesheshi.com.
Sipas marrëveshjes së Brukselit, të firmosur nga dy kryeministrat, kompanitë serbe që janë të regjistruara në Kosovë, iu lejohen që deri në 30 mijë euro ne muaj të fusin mall nga Serbia në Kosovë, pa asnjë lloj tatimi, e mbi këtë shumë bizneset serbe janë të detyruar që t’i paguajnë tatime shtetit të Kosovës.
Burimi ka shtuar se “Shteti serb është duke e faktorizuar këtë lloj kontrabande për arsye se ajo nuk dëmton Serbin, por e forcon atë ekonomikisht pasi që malli që hyn në Kosovë nga Serbia nuk paguan tatime, pra shitet më lirë dhe hyn në treg në mënyrë të pabarabartë”.
Kjo kontrabande përkrahet nga Serbia ngase ndikon direkt në dëmtimin e buxhetit të Kosovës, si dhe në shkatërrimin e ecurisë financiare të Kompanive të Kosovës të cilat paguajnë taksat.
Në këtë kontrabandë janë të përfshirë policia e Kosovës dhe ajo e Serbisë.
“Nëse policia Serbisë matanë kufirit ndalon një kamion të ngarkuar me mall, ajo në bazë të ligjit është dashur që ta kthejë dhe ta dërgojë në terminalin doganor në Novi Pazar apo në Rashkë”, sqaron burimi.
Një gjë e tillë nuk ndodh pasi që kontranduesit i kanë korruptuar edhe policinë e Serbisë si dhe atë të Kosovës.
Një tregtar nga veriu i Kosovës, thekson për tesheshi.com se policisë së Serbisë për kamion iu japin rryshfet nga 10 deri në 20 euro, ndërsa policëve të Kosovës u janë dhënë shifra edhe më të mëdha.
Tregtari thekon se në një rast që ka ndodhur tek manastiri në fshatin ‘Banov do’ të Zvecanit, në kamionin që e kisha ngarkuar me pije alkoolike kontrabandë, policëve të Kosovës u detyrova tu jap 100 euro ryshfet”. Në të kundërten policët do të më dërgonin në terminalin doganor që gjendet në jug të Mitrovicës, ka shtuar tregtari serb për portalin ‘tesheshi.com’.
/tesheshi.com/
Së shpejti do të lexoni:
Ditëve të ardhshme portali ‘tesheshi.com’, do të sjellë rrëfimin e kontrabandimit të mallit vetëm me letra, faktet me emra të plota se cilat janë kompani të Kosovës dhe ato të Serbisë që janë të përfshira në kontrabandë të mallrave në Kosovë
