Një i vdekur dhe shtatë të plagosur është bilanci provizor i një shpërthimi pranë konlullatës italiane në kryeqytetin e Egjiptit.
Një autobombë ka shpërthyer ndanë ndërtesës, e cila ishte gjithsesi e mbyllur. Bilanci i viktimave është gjithsesi provizor.
Ndërkaq deri tani, asnjë grup nuk ka marrë përsipër autorësinë. Së fundmi Egjipti është tronditur nga një seri atentatesh të rënda, mes të cilave spikat ai që i mori jetën kryeprokurorit Hisham Barakat, nga një sulm autobombë në qytetin e tij.
Në të njëjtin muaj, një tjetër autobombë vuri në shënjestër një komisariat policie, duke vrarë tre persona. Forcat egjiptiane të sigurisë janë në luftë me disa grupime të armatosura, por luftimet kanë qenë kryesisht të kufizuara në gadishullin e Sinait.
Këta grupime kanë vrarë të paktën 600 anëtarë të personelit policor dhe atij ushtarak në dy vitet e fundit. Ata i avancuan sulmet e tyre pasi ushtria rrëzoi ish-presidentin, Mohammed Morsi në vitin 2013.
Në javët e fundit, presidenti egjiptian Abdul Fattah al Sisi ka premtuar se do të përdorë dorë të hekurt ndaj atentatorëve.
Pas këtij fjalimi qindra anëtarë të “Vllazërisë Myslimane”, përfshirë presidentin e rrëzuar Morsi, janë dënuar me vdekje nga gjykatat e Egjiptit. Shumica e tyre janë në pritje të ekzekutimit. /tesheshi.com/
