Socialdemokratët gjermanë zgjedhin “Merkelin” e tyre.
Partia e dytë më e rëndësishme në Gjermani dhe partnere në qeverinë aktuale, ka zgjedhur një grua në vend të Martin Shchulz, i cili tashmë është vetëm deputet i thjeshtë në Bundestag.
Ajo është Andrea Nahles, një 47-vjeçare që arriti të marrë 66% të votave në Kongresin e PSD-së gjermane, duke garuar me një tjetër grua, Simone Lan.
Deutsche Wele shkruan se Andrea Nahles, e cila ka qenë në legjislaturën e kaluar shefe e grupit parlamentar të socialdemokratëve në Bundestag, njihet si një politikane e fuqishme, me vendime të prera.
Në kohën e negociatave për koalicionin e tanishëm me partitë e Unionit, pas dështimit të negociatave me liberalët dhe ekologjistët, Nahles është dëshmuar si një negociatore shumë e fuqishme dhe e prerë ndaj kancelares Merkel. Pas tërheqjes së Schulz në janar të këtij viti, ajo ishte në fakt drejtuesja de fakto e SPD-së, dhe kongresi i fundit vetëm sa e formalizoi postin që realisht Nahles e kishte fituar në sytë e mbështetësve të partisë së saj.
Ajo ishte edhe shtytësja kryesore për krijimin e një tjetër Grosse Koalition me Angela Merkelin, edhe pse shumë socialdemokratë nuk e përkrahnin më këtë version.
Andrea Nahles ka lindur me 1970 në Eife, në një familje punëtorësh. Babai i saj ishte murator. Në vitin 1995 ajo është zgjedhur kryetare e rinisë socialdemokrate dhe në atë kohë ishte shumë më e afërt me qëndrimet e Oskar Lafontaine sesa të ish-kancelarit Gerhard Schröder, i cili në këtë post është zgjedhur në vitin 1998.
Në vitin 2009 Nahles u zgjodh anëtare e kryesisë dhe sekretare e përgjithshme e SPD.
Me 2013 mori postin e ministres për Punë dhe çështje Sociale.
Pas rezultateve shumë të dobëta në zgjedhjet e fundit, Nahles tani i duhet të rithemelojë partinë.
Pjesë e këtij riorientimi mund të jetë edhe zhvendosja e partisë në të majtë, që mund të jetë vendimtare për zgjedhjet e ardhshme parlamentare të cilat do të mbahen më së largu në vitin 2021.
Kur e pyetën Andrea Nahlesin pas përfundimit të gjimnazit se çdo të bëhej kur të rritej ajo u përgjigj: amvisë ose kancelare.
Nuk është çudi që 47-vjeçarja nga Gjermania Perëndimore të pasojë Angelan, gruan që erdhi nga Lindja dhe që për mbi 20 vjet kontrollon Gjermaninë. /tesheshi.com/
