Një tjetër kosovar dyshohet të jetë vrarë ditët e fundit në Siri. Një burim kofidencial i tha tesheshi.com se fjala është për Arianit Rr. Beqiri, 17-vjeç, nga fshati Sllatin i Komunës së Vushtrrisë.
Por rrethanat se si është vrarë, nga kush dhe se ku ka qenë i rreshtuar, nuk bëhen të ditura.
Lidhur me këtë vrasje, edhe zyrtarë të policisë së Kosovës në Mitrovicë i kanë thënë portalit tesheshi.com se kanë marrë një informacion se A. Rr. B. 17 vjeç, dyshohet të jetë vrarë në luftën e Sirisë, ndërkohë që dhe familja ka hapur derën për të pritë njerëzit për kryeshëndosh.
Sipas zyrtarit të policisë, njësia e antiterrorit ka patur një takim me babain e personit të vrarë në Siri, gjatë kohës sa familja ka pasuar derën e hapur për të pritur miq e familjarë për kryeshëndosh.
Zyrtari i policisë së Kosovës nuk ka dhënë detaje se çfarë është folur në këtë takim në mes babait dhe policisë së Antiterrorit.
Ky është shqiptari i pestë nga rajoni i Mitrovicës që dyshohet të jetë vrarë në Siri.
Nga ky rajon dyshohet të jenë edhe 10 shqiptarë të tjerë të Kosovës atje, në frontin e Sirisë, ku numri më i madh i tyre mendohet të jetë nga fshati Kçiq i Mitrovicës. /tesheshi.com/
